నాకు మూడేండ్ల క్రితం పెండ్లయింది. మా వారు వ్యాపారవేత్త. ఇంకా పిల్లలు లేరు. ఆయన బిజినెస్ పనుల మీద తరచూ టూర్స్ వెళ్తుంటారు. నెలకు ఇరవై రోజులు ఇంట్లోనే ఉండరు. మిగతా పది రోజులు కూడా బిజీబిజీ. మా ఆయన ప్రాణ స్నేహితుడు తరచూ మా ఇంటికి వస్తుంటాడు. బయటి పనుల్లో సాయం చేస్తుంటాడు. ఒంటరితనాన్ని భరించలేక తనతో ఫోన్లో మాట్లాడుతుంటాను. అప్పుడప్పుడూ ఏ రెస్టారెంట్కో తీసుకెళ్తాడు.
అల్లరి చేస్తాడు. తెగ నవ్విస్తాడు. ప్రత్యేక సందర్భాల్లో కానుకలూ ఇస్తుంటాడు. దీంతో కొంత సామీప్యం పెరిగింది. ఈ విషయాలేవీ మా ఆయనకు తెలియవు. మావారు ఎదురుగా ఉన్నప్పుడు మాత్రం నన్ను ‘బాబీ.. బాబీ’ అని పిలుస్తుంటాడు. ఆ నటన చూసి నవ్వు ఆపుకోలేక పోతాను. అతనితో పడక పంచుకున్నట్టు ఈమధ్య కల వచ్చింది. అప్పటి నుంచీ చాలా ఆందోళనగా అనిపిస్తున్నది. నేను చేస్తున్నది తప్పా? అతణ్ని దూరం పెట్టాలా?
మీ ప్రశ్నలోనే సమాధానం ఉంది. మీ వివరణలోనే కొంత పశ్చాత్తాపం కనిపిస్తున్నది. మీ ఆయన ప్రాణ స్నేహితుడంటూ ఆ వ్యక్తిని పరిచయం చేస్తున్నారు. ప్రాణస్నేహితులెవరూ ఈ తరహా చనువు తీసుకోరు. ఇదంతా కేవలం ఆకర్షణే. ఖాళీ బుర్ర దయ్యాల కార్ఖానా అంటారు. ఏ పనీ లేకపోవడం, ఏ బాధ్యతా తీసుకోకపోవడం వల్ల మీ ఆలోచనలు పక్కదారి పడుతున్నాయి. మీ ఒంటరితనమే మీ శత్రువుగా మారుతున్నది. మీరు ఉంటున్న ఖరీదైన ఫ్లాట్, మీరు ధరిస్తున్న బ్రాండెడ్ దుస్తులు, మీరు షికారుకు తీసుకెళ్లే కారు.. అన్నీ మీ ఆయన కష్టార్జితమే. మీ భర్త గురించి మీరు ఎలాంటి ఫిర్యాదూ చేయలేదు. అంటే, మంచివాడనే కదా అర్థం. ఆ మంచితనాన్ని అలుసుగా తీసుకోవద్దు. మీకు, మీ వారికి మధ్య చిన్నపాటి అగాథం ఏర్పడిన మాట నిజమే. దాన్ని సరిచేసుకోండి.
ఈ విషయంలో మీరు ఇంకొంత చొరవ చూపండి. అతను ఇంట్లో ఉన్నప్పుడు.. మనసు విప్పి మాట్లాడండి. టూర్లో ఉన్నప్పుడు.. ఫోన్ చేసి పలకరించండి. ‘మీరు దూరంగా ఉన్నా సరే.. నా మనసుకు మాత్రం దగ్గరలోనే ఉన్నారు’ అనే భావన కలిగించండి. మీ బంధం తప్పక బలపడుతుంది. ఆ పిచ్చి కల గురించి ఆందోళన చెందాల్సిన పన్లేదు. మనసులో ఏ మూలనో ఉన్న ఆలోచనకు అదో దృశ్యరూపం. బుర్రలోంచి తుడి చేయండి. ఆ వ్యక్తి మీ వారి ముందే కాదు, మీ ముందు కూడా నటిస్తున్నాడేమో? జాగ్రత్త.