న్యూయార్క్ : అరుదైన వ్యాధితో బాధపడుతున్న మహిళ రోజుకు ఏకంగా 22 గంటలు నిద్రిస్తుండటంతో ఆమెను రియల్ లైఫ్ స్లీపింగ్ బ్యూటీగా (Sleeping Beauty) పిలుస్తున్నారు. జొనా కాక్స్ (38) అతి నిద్రతో బాధపడుతూ పగలు మేల్కొని ఉండేందుకు నానా పాట్లు పడుతోంది. నిద్ర లేవడం కష్టంగా అనిపిస్తూ విశ్రాంతి లేమితో కుంగుబాటుకు గురయ్యే పరిస్ధితి కలిగిన ఇడియోపాథిక్ హైపర్సోమ్నియాతో ఆమె బాధపడుతోంది. 2017లో పగలంతా విపరీతమైన అలసటకు గురవడంతో ఆమెకు ఈ విచిత్రమైన లక్షణాలు ఎదురయ్యాయి. క్లబ్బులు, కారులు ఇలా ఎక్కడ పడితే అక్కడ నిద్రకు ఉపక్రమించిన అనుభవాలు జొనాకు ఎదురయ్యాయి.
తొలుత కుంగుబాటుకు గురైనట్టు అనిపించి మానసిక వైద్యులను సంప్రదించింది. అలసటతో పాటు ఎలాంటి లక్షణాలు లేకపోవడంతో డిప్రెషన్ కాదని గుర్తించామని జొనా చెప్పుకొచ్చింది. ఇక లక్షణాలు మరింత విషమించడంతో ఆమె ఏ వ్యాధికి లోనయ్యారనేది ఎవరూ గుర్తించలేకపోయారు. అతినిద్రతో 2019లో జొనా తన ఉద్యోగాన్ని విడిచిపెట్టాల్సి వచ్చింది. ఆపై 2021 అక్టోబర్లో ఆమెను యార్క్షైర్లోని స్లీప్ క్లినిక్కు తీసుకువెళ్లగా జొనా అరుదైన స్లీప్ డిజార్డర్తో బాధపడుతున్నట్టు బయటపడింది. ఇక అప్పటినుంచి ఆమె పరిస్ధితి ఏటికేడు దిగజారుతోంది. నిద్ర లేవాలని అనిపిస్తే ఆమె బెడ్పైకి వందలాది సాలీడ్లు దాడి చేసినట్టు అనిపించేది.
ఆహారం తయారయ్యే లోపు నిద్ర ముంచుకొస్తుందనే భయంతో జొనా ప్రొటీన్ షేక్స్, రెడీ టూ ఈట్ ఫుడ్ను ఎంచుకునేది. ఈ పరిస్ధితి తనకు నరకాన్ని తలపిస్తోందని, తాను రియల్ లైఫ్ స్లీపింగ్ బ్యూటీనని..తాను నిద్రపోతే ఇక లేవలేనని..డ్రైవింగ్ చేయలేను..నేను మెళకువగా ఉంటానని తెలీదు కనుక ఎలాంటి ప్లాన్లూ ఉండవని జొనా ఆవేదన వ్యక్తం చేస్తోంది. ఓ రోజు తాను 12 గంటలు మేలుకొన్నానని, ఆరేండ్లలో ఎక్కువసేపు నిద్రించని సమయం ఇదేనని పేర్కొంది. ఎన్నో మందులు, థెరఫీలు వాడినా తన పరిస్ధితి మెరుగవలేదని, తాను మళ్లీ సాధారణ జీవితం గడిపేలా సాయం చేసే వైద్యుడు త్వరలోనే తనకు అందుబాటులోకి వస్తారని ఆమె ఆశాభావం వ్యక్తం చేసింది.
Read More :