మా అమ్మను చూస్తుంటే.. బొమ్మరిల్లు చిత్రంలో నాన్న పాత్ర గుర్తుకొస్తుంది. నేను ఏం తినాలో, ఏ డ్రెస్ వేసుకోవాలో, ఏ చెప్పులు తొడగాలో.. ఒకటేమిటి, ప్రతి విషయం అమ్మే నిర్ణయిస్తుంది. నాకంటూ ఓ వయసు వచ్చింది. మంచిచెడులు తెలుసుకునే పరిణతి ఉంది. అయినా, ఇలా వెంటపడటం కరెక్టేనా? తనవల్ల నా ఆత్మవిశ్వాసం దెబ్బతింటున్నది.
మీ అమ్మ అందరు అమ్మల్లాంటిదే. టీవీలో వార్తలు, పత్రికల్లో కథనాలు, అమ్మలక్కల ముచ్చట్లు ఆమెను ప్రభావితం చేస్తుంటాయి. నీ అభిప్రాయాల కంటే నీ భద్రతే తనకు ముఖ్యం. తన ప్రవర్తన కొంత అతిగా అనిపించవచ్చు కానీ, అసహజమేం కాదు. ఆ భద్రతారాహిత్యం తాలూకు ప్రభావాలే ఇవన్నీ. ముందుగా తనను ద్వేషించడం మానేయండి.
మనసు విప్పి మాట్లాడండి. మీ ఆవేదనను తప్పక అర్థం చేసుకుంటుంది. కానీ అందుకు కొంత సమయం పడుతుంది. అప్పటివరకూ ఎదురుచూడక తప్పదు. మీరు కూడా ఒక్కసారిగా తిరుగుబాటు జెండా ఎగరేయకుండా.. కొద్దికొద్దిగా తనను మార్చుకునే ప్రయత్నం చేయండి.