నిద్రకు గ్రీన్‌ సిగ్నల్‌!

ప్రకృతిలో వినిపించే మంద్రమైన శబ్దాల కలయికే.. గ్రీన్‌ నాయిస్‌! ఇది వినడానికి చాలా ప్రశాంతంగా, హాయిగా ఉంటుంది.

ప్రకృతిలో వినిపించే మంద్రమైన శబ్దాల కలయికే.. గ్రీన్‌ నాయిస్‌! ఇది వినడానికి చాలా ప్రశాంతంగా, హాయిగా ఉంటుంది. ఇందులో దూరం నుంచి వినిపించే జలపాతాల హోరు, నదీ ప్రవాహపు శబ్దాలు, గాలికి ఊగుతున్న చెట్ల ఆకుల గలగలలు, చిరుజల్లుల సరాగాలు అన్నీ మిళితమై ఉంటాయి.

కమ్మటి నిద్రకు మంత్రం.. మంద్రమైన సంగీతం! మనసుకు ఇంపైన పాటలు వింటే.. కంటికి కునుకు పట్టడం ఖాయం. అందుకే, చాలామంది పాటలను నైవేద్యంగా పెట్టి, నిద్రాదేవిని ఆహ్వానిస్తుంటారు. అయితే, నేటితరం మాత్రం.. నిద్రకోసం ‘గ్రీన్‌ నాయిస్‌’కు గ్రీన్‌ సిగ్నల్‌ ఇస్తున్నారు. ప్రకృతిలో ఉన్న అనుభూతిని పొందుతూ.. కంటినిండా నిద్రపోతున్నారు.

ఎక్కడ లభిస్తుంది?

యూట్యూబ్‌, స్పాటిఫై లాంటి మ్యూజిక్‌ ప్లాట్‌ఫామ్‌లలో green noiseఅని సెర్చ్‌ చేస్తే గంటల తరబడి ప్లే అయ్యే ఆడియో ట్రాక్స్‌ ఉచితంగా లభిస్తాయి. నిద్రలేమి, ఏకాగ్రత సమస్యలతో ఇబ్బంది పడుతుంటే.. గ్రీన్‌ నాయిస్‌ను ప్రయత్నించి చూడొచ్చు!

సానుకూల ప్రభావం

• రాత్రిపూట బయటి నుంచి వచ్చే ట్రాఫిక్‌, కుక్కల అరుపుల్లాంటి అవాంఛనీయ శబ్దాలను గ్రీన్‌ నాయిస్‌ అడ్డుకుంటుంది. దీనివల్ల మెదడు త్వరగా ప్రశాంతపడి.. గాఢ నిద్రలోకి వెళ్తుంది.
• చదువుకునేటప్పుడు, పని చేస్తున్నప్పుడు వింటే.. ఏకాగ్రత దెబ్బతినకుండా ఉంటుంది.
• గ్రీన్‌ నాయిస్‌ను వినడం వల్ల ప్రకృతి ఒడిలో ఉన్న అనుభూతి కలుగుతుంది. దాంతో మానసిక ఆందోళన తగ్గుతుంది.
• గ్రీన్‌ నాయిస్‌ ఫ్రీక్వెన్సీ స్పెక్ట్రమ్‌ 500Hzపరిధిలో కేంద్రీకృతమై ఉంటుంది. మనుషుల చెవికి అత్యంత సౌకర్యవంతంగా ఉండే పౌనఃపున్యం ఇదే!
• నిద్రకే కాదు.. పనిచేసే చోట ఏకాగ్రత పెంచడానికీ గ్రీన్‌ నాయిస్‌ సాయపడుతుంది. ఆఫీసులో ఇతరులు మాట్లాడుకునే మాటలు, కీబోర్డ్‌ శబ్దాలు మన మెదడును త్వరగా డైవర్ట్‌ చేస్తాయి. గ్రీన్‌ నాయిస్‌ ఒక లేయర్‌లా ఏర్పడి.. ఆ శబ్దాలను మీ మెదడు గుర్తించకుండా ‘మాస్క్‌’ చేస్తుంది. అలా పనిమీద ఏకాగ్రతనూ పెంచుతుంది.
• ఏడీహెచ్‌డీ సమస్యతో బాధ పడుతున్నవారు గ్రీన్‌ నాయిస్‌ వినడం వల్ల మంచి ఫలితాలు పొందుతున్నట్లు ఇటీవలి పరిశోధనలు చెబుతున్నాయి. ఇది మెదడును ప్రశాంతంగా ఉంచి, ఒకే పనిపై దృష్టి పెట్టేలా చేస్తుంది.