Health Tips | వంటకాల్లో ఉపయోగించే చెదర్‌ చీజ్‌ ఆరోగ్యానికి మంచిదేనా?

ఇటీవల మనం వివిధ వంటకాల్లో చెదర్‌ చీజ్‌ వాడుతున్నాం. ఇది ఆరోగ్యానికి మంచిదేనా? మంచిదైతే ఎంత మోతాదులో తీసుకోవాలి?

ఇటీవల మనం వివిధ వంటకాల్లో చెదర్‌ చీజ్‌ వాడుతున్నాం. ఇది ఆరోగ్యానికి మంచిదేనా? మంచిదైతే ఎంత మోతాదులో తీసుకోవాలి?

-ఓ పాఠకురాలు

చెదర్‌ అనేది ఇంగ్లండ్‌లో ఒక ఊరి పేరు. తొలుత ఈ రకం చీజ్‌ అక్కడ మాత్రమే తయారయ్యేది. అలా చెదర్‌ చీజ్‌ అయ్యింది. దీనిని ఆవు పాలతో ప్రత్యేకమైన పద్ధతుల్లో తయారు చేస్తారు. కాబట్టి, ఆరోగ్యానికి మంచిది. ఇందులో ప్రొటీన్‌ అధికంగా ఉంటుంది. క్యాల్షియం, ఫాస్పరస్‌, జింక్‌, విటమిన్‌-బి 12 కూడా లభిస్తాయి. ఎముకల ఆరోగ్యానికి క్యాల్షియం సహకరిస్తుంది. ప్రొటీన్‌ కండరాలు పటిష్టంగా ఉండటానికి ఉపకరిస్తుంది.

విటమిన్‌ బి-12 మెదడును చురుగ్గా ఉంచుతుంది. జీవక్రియను మెరుగుపరిచేందుకు సాయ పడుతుంది. రోగ నిరోధక వ్యవస్థను జింక్‌ బలోపేతం చేస్తుంది. తయారీలో భాగంగా పాలను పులియబెడతారు కనుక, ప్రొ బయాటిక్‌గా జీర్ణవ్యవస్థ ఆరోగ్యాన్ని కాపాడుతుంది. అయితే ఇందులో కొంతమేర శాచురేటెడ్‌ ఫ్యాట్స్‌, సోడియం ఉంటాయి. కాబట్టి, పరిమితంగా తీసుకుంటేనే మంచిది.

పరిపూర్ణ ఆరోగ్య వంతులు రోజుకు ఒక టేబుల్‌ స్పూన్‌ చొప్పున వారానికి ఒకటి రెండు సార్లు తినొచ్చు. బీపీ, కొలెస్ట్రాల్‌ సమస్యలు ఉన్నవాళ్లు ఆహారంలోని కేలరీలను చూసుకొని తినాలి. సలాడ్లు, ఉడకబెట్టిన కూర గాయలతో పాటు, శాండ్‌విచ్‌, దోశ.. ఇలా మన అభిరుచిని బట్టి ఈ చీజ్‌ను జోడించుకోవచ్చు. సోడియం ఉండటం వల్ల ఎక్కువకాలం నిల్వ ఉంటుంది. శాకాహారులకు మంచి ప్రొటీన్‌ సోర్స్‌ .

మయూరి ఆవుల , న్యూట్రిషనిస్ట్‌
Mayuri.trudiet@gmail.com