ఖమ్మం: స్తంభాద్రి అర్బన్ డెవలప్మెంట్ అథారిటీ (సుడా) పరిధిలోని పలు గ్రామాలలో ప్రభుత్వం నుంచి ఎలాంటి అనుమతులు లేకుండా ఏర్పాటు చేస్తున్న అక్రమ వెంచర్లపై సుడా చైర్మన్ బచ్చు విజయ్కుమార్ కొరడా ఝులిపిస్తున్నారు. గత రెండు రోజుల నుంచి సుడా పరధిలోని ఖమ్మం రూరల్, ముదిగొండ, కొణిజర్ల మండలాల పరిధిలోని పలు వెంచర్లను ఆయన స్వయంగా పరిశీలించారు. అక్రమంగా నిర్మించేవారిపై చర్యలు తీసుకోవాలని సంబంధిత మండల అధికారులను ఆదేశించారు.
శనివారం ఖమ్మం రూరల్ మండలంలోని ఆరెంపుల , బారుగూడెం, గొల్లగూడెం, యం.వెంకటాయపాలెం గ్రామాల పరిధిలో గల అక్రమ వెంచర్లపై చట్టపరంగా కఠినంగా చర్యలు తీసుకోవాలని అధికారులను ఆదేశించారు. అక్రమ వెంచర్లకు నోటిసులు జారీ చేసినప్పటికి స్పందించని వెంచర్లను తొలగించి నివేదిక సమర్పించాలని అధికారులను కోరారు.