రైతుల‌కు డీఏవో పుల్ల‌య్య‌ పెస‌ర విత్త‌నాలు పంపిణీ

ఏదులాపురం మున్సిపాలిటీ పరిధిలోని పలు వార్డుల్లో శుక్రవారం జిల్లా వ్యవసాయ శాఖ అధికారి దానసరి పుల్లయ్య పర్యటించారు. కూసుమంచి డివిజన్ వ్యవసాయ శాఖ సహాయ సంచాలకుడు రాజేష్ తో కలిసి ఆయన గుర్రాలపాడు, గుదిమళ్ల‌, కొత్తగూడెం, వెంకటగిరిలో..

ఖమ్మం రూరల్, అక్టోబ‌ర్ 09 : ఏదులాపురం మున్సిపాలిటీ పరిధిలోని పలు వార్డుల్లో శుక్రవారం జిల్లా వ్యవసాయ శాఖ అధికారి దానసరి పుల్లయ్య పర్యటించారు. కూసుమంచి డివిజన్ వ్యవసాయ శాఖ సహాయ సంచాలకుడు రాజేష్ తో కలిసి ఆయన గుర్రాలపాడు, గుదిమళ్ల‌, కొత్తగూడెం, వెంకటగిరిలో పర్యటించారు. వెంకటగిరి రైతు వేదికలో ఎం జి జి 385 పెసర విత్తనాలను రైతులకు పంపిణీ చేశారు. ఆయా గ్రామాల్లో వ్యవసాయ యంత్రాల సద్వినియోగం గూర్చి క్షేత్రస్థాయిలో ఆరా తీశారు. ఈ సందర్భంగా డీఏవో పుల్లయ్య మాట్లాడుతూ.. ఎల్ నినో ప్రభావం ప్రత్యక్షంగా కనపడుతున్న నేపథ్యంలో అందుకు అనుగుణంగా రైతులు పంటల సాగులో మార్పులు చేసుకోవాల్సి ఉంటుందన్నారు.

రాబోయే రబీ సీజన్‌లో సైతం అతి తక్కువ వర్షపాతం నమోదు అయ్యే అవకాశం ఉందన్నారు. నేల స్వభావం, తక్కువ నీటి వనరులతో సాగు అయ్యే పంటల సాగు మాత్రమే చేపట్టాలని రైతులకు సూచించారు. ప్రత్యామ్నాయ పంటలుగా అపరాల పంటల సాగు ఎంతో ప్రయోజనం కలిగిస్తుందని, ఎప్పటికప్పుడు విస్తరణ అధికారులు, వ్యవసాయ శాఖ అధికారి సలహాలు సూచనలు తీసుకోవాలని రైతులకు సూచించారు. ఈ కార్యక్రమంలో మండల వ్యవసాయ శాఖ అధికారి జై ఉమా నాగేష్, విస్తరణ అధికారులు వంశీ, ఆదర్శ్, పలువురు రైతులు పాల్గొన్నారు.