ఖమ్మం, ఆగస్టు 25: పర్యావరణ పరిరక్షణ, కాలుష్య నియంత్రణ కోసం మట్టి విగ్రహాలనే ప్రతిష్ఠించాలని, భక్తులందరూ స్వచ్ఛందంగా మట్టి విగ్రహాలను ప్రతిష్ఠించేలా ఉత్సవ కమిటీలు చైతన్యపర్చి ప్రోత్సహించాలని ఖమ్మం కలెక్టర్ వీపీ గౌతమ్ సూచించారు. ఈ నెల 31న వినాయకచవితి సందర్భంగా గణేశ్ నవరాత్రి ఉత్సవాలు, నిమజ్ఞన ఏర్పాట్లపై కలెక్టరేట్ ప్రజ్ఞా సమావేశ మందిరంలో వివిధ శాఖల అధికారులు, స్తంభాద్రి ఉత్సవ కమిటీ బాధ్యులతో గురువారం ఏర్పాటు చేసిన సన్నాహక సమావేశంలో కలెక్టర్ మాట్లాడారు. గడిచిన రెండేళ్ల అనుభవాలను పరిగణనలోకి తీసుకొని ఈ సంవత్సరం మరింత మెరుగైన ఏర్పాట్లు చేసేందుకు అధికారులు ముందస్తు చర్యలు చేపట్టాలని సూచించారు. ఈ నెల 31 వినాయక విగ్రహాల ప్రతిష్ఠాపన, సెప్టెంబర్ 10న నిమజ్జనోత్సవం నిర్వహించేలా ఉత్సవ కమిటీలు నిర్ణయించాయన్నారు.
ఈ నేపథ్యంలో మండపాల ఏర్పాటు, సౌండ్ సిస్టమ్, లైటింగ్ తదితర వసతుల కోసం ఆయా మండపాలు, ఉత్సవ కమిటీల బాధ్యులు ముందస్తుగా ఆయా శాఖల అధికారుల వద్ద అనుమతి పొందాల్సి ఉంటుందన్నారు. ప్రతిష్ఠించిన మట్టి విగ్రహాల్లో అతిపెద్ద, అత్యుత్తమ మట్టి విగ్రహాలకు ప్రథమ, ద్వితీయ, తృతీయ బహుమతులను అందించనున్నట్లు చెప్పారు. నగరంలో మున్నేరు, ప్రకాశ్నగర్ ప్రాంతాల్లో నిమజ్జన ఘాట్లు ఉంటాయన్నారు. ట్రాఫిక్ అంతరాయం కలుగకుండా రూట్మ్యాప్ సిద్ధం చేయాలని పోలీసు అధికారులకు సూచించారు. నిమజ్జనాల ప్రాంతాల్లో పారిశుధ్యం, తాగునీరు, లైటింగ్, బార్కేడింగ్, నిమజ్జన ప్లాట్ఫామ్స్, క్రేన్స్ తదితర ఏర్పాట్లను నగర పాలక సంస్థ ద్వారా చేపట్టాలన్నారు. నిమజ్ఞన ప్రదేశాల్లో గజ ఈతగాళ్లను సిద్ధంగా ఉంచాలని, అగ్ని ప్రమాదాల నివారణ కోసం ముందస్తు చర్యలతో సిద్ధంగా ఉండాలని ఆదేశించారు. ఖమ్మం, వైరా, సత్తుపల్లి, మధిర మున్సిపాలిటీల పరిధిలో నిమజ్జన ఏర్పాట్లను ముందుగానే సిద్ధం చేయాలని మున్సిపల్ కమిషనర్లను కలెక్టర్ ఆదేశించారు. ఖమ్మంలో అధికారులు, ప్రజాప్రతినిధులు, ఉత్సవ కమిటీల బాధ్యుల సహకారంతో మరింత మెరుగైన వసతులు కల్పించేలా ఏర్పాట్లు చేస్తామని మేయర్ పునుకొల్లు నీరజ, సుడా చైర్మన్ బచ్చు విజయ్కుమార్ తెలిపారు. అదనపు కలెక్టర్లు స్నేహలత మొగిలి, ఎస్.మధుసూదన్, డిప్యూటీ మేయర్ ఫాతిమా, కేఎంసీ కమిషనర్ ఆదర్శ్ సురభి, ఏసీపీలు ప్రసన్నకుమార్, రామోజీ రమేశ్, వివిధ శాఖల అధికారులు సురేందర్, రాధిక, పుల్లారావు, శ్రీనివాస్, మాలతి, కిషన్రావు, టీ.వెంకటేశం, ఎన్.వెంకటపతిరాజు, రమాదేవి, సుజాత, రవీంద్రనాథ్, సూర్యనారాయణ పాల్గొన్నారు.