ఉమ్మడి జిల్లాలోని పది నియోజకవర్గాల్లో బీఆర్ఎస్ ప్రచారం జోరుగా సాగుతోంది. గెలుపే ధ్యేయంగా బీఆర్ఎస్ సైన్యం ఊరూరా.. వీధివీధినా పర్యటిస్తున్నది. గడప గడపకూ వెళ్లి పదేళ్లలో బీఆర్ఎస్ ప్రభుత్వం సాధించిన ప్రగతి, ప్రజలకు అందించిన సంక్షేమ పథకాలతోపాటు ఎన్నికల మ్యానిఫెస్టో గురించి వివరిస్తూ ఓట్లు అభ్యర్థిస్తున్నది. నియోజకవర్గాల్లో బరిలో నిలిచిన అభ్యర్థులు సభలు, సమావేశాలు, రోడ్ షోల్లో ప్రసంగిస్తూ ఓటర్లను ప్రసన్నం చేసుకుంటున్నారు.
గురువారం ఖమ్మంలో మంత్రి పువ్వాడ, కొత్తగూడెం నియోజకవర్గం లక్ష్మీదేవిపల్లి మండలంలో ఎమ్మెల్యే వనమా, పినపాక నియోజకవర్గం కరకగూడెం మండలంలో ప్రభుత్వ విప్ రేగా, అశ్వారావుపేట నియోజకవర్గం దమ్మపేట మండలంలో ఎమ్మెల్యే మెచ్చా, భద్రాచలం నియోజకవర్గం చర్ల మండలంలో అభ్యర్థి తెల్లం, సత్తుపల్లి నియోజకవర్గం పెనుబల్లి మండలంలో ఎమ్మెల్యే సండ్ర, పాలేరు నియోజకవర్గం నేలకొండపల్లి, తిరుమలాయపాలెం మండలాల్లో ఎమ్మెల్యే కందాళ, ఇల్లెందు నియోజకవర్గం బయ్యారం మండలంలో ఎమ్మెల్యే హరిప్రియ, వైరా నియోజకవర్గం కారేపల్లి మండలంలో అభ్యర్థి మదన్లాల్, మధిర నియోజకవర్గం ఎర్రుపాలెం మండలంలో అభ్యర్థి కమల్రాజు విస్తృతంగా ప్రచారం చేశారు.