‘తురకకాశ కార్మికులకు జనరేటర్లు అందించాలి’

భ‌ద్రాద్రి కొత్త‌గూడెం జిల్లాలో తురక కాశ కార్మికుల కోసం ప్రభుత్వం మంజూరు చేసిన జనరేటర్లు అర్హులైన కార్మికులకు అందేలా చూడాలని తురకకాశ సంక్షేమ సంఘం నాయకులు క్యాంపు కార్యాలయంలో ఎమ్మెల్యే పాయం వెంకటేశ్వర్లును గురువారం కలిసి వినతిపత్రం అందజేశారు.

– ఎమ్మెల్యే పాయం వెంకటేశ్వర్లుకు సంఘ నాయకుల వినతి

బూర్గంపహాడ్, సెప్టెంబర్ 24 : భ‌ద్రాద్రి కొత్త‌గూడెం జిల్లాలో తురక కాశ కార్మికుల కోసం ప్రభుత్వం మంజూరు చేసిన జనరేటర్లు అర్హులైన కార్మికులకు అందేలా చూడాలని తురకకాశ సంక్షేమ సంఘం నాయకులు క్యాంపు కార్యాలయంలో ఎమ్మెల్యే పాయం వెంకటేశ్వర్లును గురువారం కలిసి వినతిపత్రం అందజేశారు. ఈ సందర్భంగా సంఘ నాయకులు మాట్లాడుతూ.. ప్రభుత్వం మంజూరు చేసిన జనరేటర్ల కేటాయింపులో అర్హులైన కొందరు కార్మికులకు అన్యాయం జరుగుతుందని ఆయన దృష్టికి తీసుకువ‌చ్చారు. జనరేటర్ల కేటాయింపు ప్రక్రియపై తమకు పలు అభ్యంతరాలు ఉన్నాయని, అర్హులైన అసలైన తురకకాశ కార్మికులకు ఈ పథకం ప్రయోజనం అందేలా చూడాలని కోరారు. జనరేటర్ల కేటాయింపుపై సమగ్ర విచారణ జరిపి నిర్దేశించిన నిబంధనల ప్రకారం అర్హులకు జనరేటర్లు అందేలా అధికారులతో మాట్లాడి చర్యలు తీసుకోవాలని ఎమ్మెల్యేను కోరారు. ఈ కార్యక్రమంలో సంఘం జిల్లా ఉపాధ్యక్షుడు షేక్ బికారి, బూర్గంపహాడ్ మండల అధ్యక్షుడు షేక్ అజీజ్, అశ్వాపురం మండల అధ్యక్షుడు షేక్ ఖలీల్, జనరల్ సెక్రటరీ షేక్ మదర్వలి, అంజనాపురం గ్రామ అధ్యక్షుడు షేక్ ఖాసీం, రాజమ్మద్ పాల్గొన్నారు.