ఖమ్మం, సెప్టెంబర్ 1 (నమస్తే తెలంగాణ ప్రతినిధి) : రాష్ట్రవ్యాప్తంగా ఉపాధ్యాయుల బదిలీలు, పదోన్నతులకు పచ్చజెండా ఊపిన తెలంగాణ ప్రభుత్వం అందుకు సంబంధించి శుక్రవారం షెడ్యూల్ను విడుదల చేసింది. ప్రక్రియ అంతా పారదర్శకంగా నిర్వహించేందుకు వెబ్ కౌన్సిలింగ్ విధానంలో చేపట్టేందుకు పూనుకుంది. బదిలీలకు సంబంధించి ప్రభుత్వం, విద్యాశాఖ పూర్తిస్థాయిలో కసరత్తు చేసి ఆన్లైన్ విధానంలో పర్యవేక్షణ చేయనుంది. తెలంగాణ ఉద్యమంలో కేసీఆర్కు వెన్నంటి ఉండి.. ఉద్యమంలో తమవంతు పాత్ర పోషించిన ఉపాధ్యాయుల సంక్షేమానికి పెద్దపీట వేస్తోంది. ప్రభుత్వం వారి సమస్యలను దూర దృష్టితో ఆలోచిస్తూ ఎప్పటికప్పుడు పరిష్కారం చేస్తూ ముందుకు సాగుతుండగా.. కొందరు మాత్రం బదిలీలు, పదోన్నతుల ప్రక్రియ ఆగాలని పలు రకాలుగా ఆరోపిస్తూ కోర్టుకెక్కారు. దీనిపై అంశాలవారీగా విచారించిన న్యాయస్థానం ఆయా కేసులన్నీంటినీ కొట్టివేసింది. దీంతో బదిలీలకు సంబంధించి ఆటంకాలన్నీ తొలగిపోయాయి. కోర్టు సూచనల మేరకు విద్యాశాఖ ప్రక్రియను చేపట్టనున్నది.
ఉపాధ్యాయుల బదిలీలకు సంబంధించిన షెడ్యూల్ను వెలువరించారు. అంతా ఆన్లైన్ విధానంలో జరుగుతుండగా.. ఈనెల 3 నుం చి 5వ తేదీ వరకు బదిలీలకు సంబంధించిన దరఖాస్తులను ఆన్లైన్ చేయాలి. గ్రేడ్-2 ప్రధానోపాధ్యాయుల పదోన్నతులకు సంబంధించిన సీనియార్టీ జాబితాను విడుదల చేయాలి. పాఠశాలవారీగా ఖాళీల జాబితా వెలువరించాలి. దీంతోపాటు ఇదే తేదీల్లో దరఖాస్తు చేసిన ఆన్లైన్ కాపీలను ప్రింట్ అవుట్ తీసి వాటికి సర్టిఫికెట్లు జతపరిచి సం బంధిత ఎంఈవో, డీఈవోలకు అందజేయాలి.
ఎస్జీటీలు, స్కూల్ అసిస్టెంట్లు, హెచ్ఎంలు, పీఈటీలు.. ఇలా అన్ని రకాలు వారికి బదిలీలు వర్తించనున్నారు. 2023 సెప్టెంబర్ 1 నాటికి రెండేళ్లు పూర్తయిన హైస్కూల్ హెచ్ఎంలు, ఉపాధ్యాయులు బదిలీలకు దరఖాస్తు చేసుకోవచ్చు. 2023 సెప్టెంబర్ 1 నాటికి ఒకే స్కూల్లో ఐదేళ్ల సర్వీస్ పూర్తి చేసుకున్న హెచ్ఎంలు, 8 ఏళ్లు పూర్తి చేసుకున్న ఉపాధ్యాయులు తప్పనిసరి బదిలీ అవుతారు. ఉద్యోగ విరమణకు మూడేళ్లలోపు సర్వీస్ కలిగిన వారికి బదిలీల నుంచి మినహాయింపునిచ్చారు. తప్పనిసరి బదిలీలో ఉండి.. బదిలీకి దరఖాస్తు చేయని, వెబ్ ఆప్షన్స్ ఇచ్చుకోని ఉపాధ్యాయులను మిగిలిపోయిన ఖాళీల్లోకి బదిలీ చేస్తారు.
ప్రభుత్వ మార్గదర్శకాల మేరకు బదిలీలు చేపట్టేందుకు సిద్ధంగా ఉన్నాం. షెడ్యూల్ ప్రకారం పూర్తి చేస్తాం. వివరాలన్ని ఇప్పటికే ఉన్నతాధికారులకు నివేదించాం. పరీశీలనతో సైతం అన్ని అంశాలపై దృష్టి సారిస్తాం. పదోన్నతులకు అర్హులైన జాబితా, ఖాళీల జాబితాను ఎంఈవోల నుంచి సేకరిస్తున్నాం. ఉన్నతాధికారుల సూచనల మేరకు ప్రక్రియను విజయవంతంగా పూర్తి చేస్తాం.