Vemulawada | మంగళపల్లిని వేములవాడలో కలపాలని ఫ్లెక్సీ తో వార్డు సభ్యుడి నిరసన

తమ గ్రామాన్ని అన్ని విధాలుగా మాకు అనుకూలంగా ఉన్న వేములవాడ మండలంలో కలపాలని కోనరావుపేట మండలం మంగళపల్లి గ్రామానికి చెందిన వార్డు సభ్యుడు ఉప్పుల జీవరత్నం డిమాండ్ చేశారు.

Vemulawada | వేములవాడ, జూన్ 4 : తమ గ్రామాన్ని అన్ని విధాలుగా మాకు అనుకూలంగా ఉన్న వేములవాడ మండలంలో కలపాలని కోనరావుపేట మండలం మంగళపల్లి గ్రామానికి చెందిన వార్డు సభ్యుడు ఉప్పుల జీవరత్నం డిమాండ్ చేశారు. వేములవాడ పట్టణంలోని కోరుట్ల బస్టాండ్ నుండి తెలంగాణ చౌక్ వరకు ఫ్లెక్సీ తో రహదారిపై నడిచి మీడియాతో మాట్లాడారు. కోనరావుపేట మండలంలో గల మంగళపల్లి గ్రామం మండల కేంద్రానికి 18 కిలోమీటర్ల దూరంలో ఉందన్నారు.

గ్రామ ప్రజల కనీస అవసరాలతో పాటు ఇతర అధికార యంత్రాంగాన్ని కూడా కలిసేందుకు తీవ్ర ఇబ్బందులు ఎదుర్కొంటున్నామని చెప్పారు. అయితే వేములవాడకు కేవలం 10 కిలోమీటర్ల దూరంలో మాత్రమే ఉన్నందున వేములవాడ మండలంలో తమ గ్రామాన్ని కలిపితే మాకు సౌకర్యంగా ఉంటుందని గ్రామస్తుల సూచన మేరకే తాను వేములవాడలో తమ ఆవేదనను వెల్లడించామని తెలిపారు. కోనరావుపేట మండల కేంద్రం వరకు పాదయాత్రగా వెళ్లి అధికారులకు వినతి పత్రం అందజేసి తమ గ్రామాన్ని వేములవాడలో కలపాలని కోరుతామని తెలిపారు.