ఎనిమిదెకరాలు.. తీరొక్క సాగు

తక్కువ పెట్టుబడితో వివిధ రకాల కూరగాయలను సాగుచేస్తూ ఎక్కువ ఆదాయం పొందుతూ ఆదర్శంగా నిలుస్తున్నాడు సారంగాపూర్‌ మండలం పెంబట్ల గ్రామానికి చెందిన యువరైతు బండారి వెంకటేశ్‌.

• తక్కువ పెట్టుబడితో కూరగాయల పంటలు
• ఆదర్శంగా నిలుస్తున్న పెంబట్ల యువరైతు

సారంగాపూర్‌, ఫిబ్రవరి 11 : తక్కువ పెట్టుబడితో వివిధ రకాల కూరగాయలను సాగుచేస్తూ ఎక్కువ ఆదాయం పొందుతూ ఆదర్శంగా నిలుస్తున్నాడు సారంగాపూర్‌ మండలం పెంబట్ల గ్రామానికి చెందిన యువరైతు బండారి వెంకటేశ్‌. 9 ఏండ్లుగా తనకున్న 8 ఎకరాల్లో సీజనల్‌గా వివిధ రకాల కూరగాయలు సాగు చేస్తున్నాడు. కూరలిసంద, క్యాబేజీ, కాలీఫ్లవర్‌, కాకర, సోర, బీర, స్వీట్‌కార్న్‌, చిక్కుడు, బటానీ, వంకాయ, నువ్వు పంటలు సాగుచేస్తున్నాడు. ప్రస్తుతం 10 గుంటల్లో కూరలిసంద, 5 గుంటల్లో కాలిఫ్లవర్‌, 10 గుంటల్లో వంకాయ, 20 గుంటల్లో బెండకాయ, అంతరపంట కింద కశ్మీర్‌ రెడ్‌ ఆఫిల్‌ బేర్‌, రెండెకరాల్లో కరబూజ సాగు చేశాడు. ఏటా సీజన్‌కు అనుగుణంగా రసాయన ఎరువులు వాడకుండా డ్రిప్‌ పద్ధతిలో సాగు చేస్తున్నాడు.

కూరగాయలతో అధిక లాభం

ఎప్పుడూ ఒకే రకమైనవి కాకుండా వివిధ రకాల కూరగాయల సాగు చేస్తే మంచి ఆదాయం వస్తుంది. నాకున్న ఎనిమిదెకరాల్లో కొంత భూమి ఖాళీగా ఉంచుతూ మిగతా భూమిలో విడుతల వారీగా వివిధ రకాల పంటలు సాగుచేస్తున్నా. పండించిన కూరగాయలను జగిత్యాలతోపాటు వివిధ ప్రాంతాల్లో విక్రయిస్తున్నా. కష్టపడి పనిచేస్తున్నందుకు ఫలితం దక్కుతున్నది. ఆసక్తి ఉన్న రైతులు నా భూమిని సందర్శిస్తే తక్కువ పెట్టుబడితో ఎక్కువ లాభాలు వచ్చే వివిధ పంటల సాగుపై అవగాహన కల్పిస్తా.