గోదావరిఖని, జనవరి 1: సింగరేణి సంస్థ 2022-23 ఆర్థిక సంవత్సరంలో డిసెంబర్తో ముగిసిన 9 నెలల కాలానికి 89శాతం బొగ్గు ఉత్పత్తి సాధించింది. ఈ ఆర్థిక సంవత్సరంలో 74మిలియన్ టన్నుల ఉత్పత్తి సాధించాలని లక్ష్యంగా పెట్టుకోగా, అంతర్గతంగా 70మిలియన్ టన్నుల ఉత్పత్తి సాధించాలని భావిస్తున్నది. ఈ ఏడాది ఏప్రిల్ నుంచి డిసెంబర్ వరకు ముగిసిన 9నెలల కాలానికి సింగరేణి సంస్థ 52.99 మిలియన్ టన్నుల బొగ్గు ఉత్పత్తి సాధించాలని లక్ష్యంగా పెట్టుకోగా, 47.22 మిలియన్ టన్నుల ఉత్పత్తి మాత్రమే సాధించింది. ఇప్పటికే 5.8 మిలియన్ టన్నుల ఉత్పత్తి వెనుకబడి ఉన్న సంస్థ, వచ్చే 3 నెలలు కీలకంగా ముందుకు సాగే అవకాశాలు కనిపిస్తున్నాయి. ఇటీవలే ఒకే రోజు 2.53లక్షల టన్నుల బొగ్గు ఉత్పత్తి సాధించి రికార్డు సృష్టించిన సంస్థ జనవరి నుంచి మార్చి వరకు భారీగా బొగ్గు ఉత్పత్తి సాధించడం ద్వారా అంతర్గతంగా నిర్దేశించుకున్న లక్ష్యాన్ని చేరుకునేందుకు కృషి చేస్తున్నది.
డిసెంబర్లో సంస్థ 73,50,000 టన్నుల బొగ్గు ఉత్పత్తిని లక్ష్యంగా నిర్ణయించుకోగా, 67,29,861 టన్నులు (92శాతం) సాధ్యమైంది. ఒక నెలలోనే 6.7మిలియన్ టన్నుల ఉత్పత్తి సాధించిన క్రమంలో వచ్చే 3 నెలల్లో ఇదే స్థాయిలో జరిగితే 20మిలియన్ టన్నుల బొగ్గు ఉత్పత్తి సాధించే అవకాశముంటుంది. ఈ 3 నెలల్లో నెలకు 7.4 మిలియన్ టన్నుల బొగ్గు ఉత్పత్తి సాధిస్తే 3 నెలల్లోనే 70 మిలియన్ టన్నుల లక్ష్యాన్ని సాధించే అవకాశాలు కనిపిస్తున్నాయి. లక్ష్యాన్ని చేరుకుంటే సింగరేణి సంస్థ చరిత్రలోనే ఈ ఏడాది రికార్డు స్థాయిలో బొగ్గు ఉత్పత్తి సాధించిన ఘనత దక్కించుకుంటుంది. 9నెలల్లో సింగరేణి వ్యాప్తంగా జరిగిన బొగ్గు ఉత్పత్తి వివరాలు కింది విధంగా ఉన్నాయి.