GodavariKhani | కుక్క పిల్లకు మాతృత్వం పంచిన కోతి.. గోదావరిఖనిలో అరుదైన దృశ్యం

పెద్దపల్లి జిల్లా గోదావరిఖనిలో అరుదైన..వింతైన సంఘటన అందరినీ ఆశ్చర్యపరిచింది. జంతువుల్లో జాతి వైరం సహజం. అందునా కోతులకు, కుక్కలకు అస్సలే పడదు. కానీ ఓ వానరం జాతి వైరంకు సవాల్ విసిరింది.

• జాతి వైరానికి సవాల్ విసిరిన వైనం

GodavariKhani | కోల్ సిటీ, మార్చి 13: పెద్దపల్లి జిల్లా గోదావరిఖనిలో అరుదైన..వింతైన సంఘటన అందరినీ ఆశ్చర్యపరిచింది. జంతువుల్లో జాతి వైరం సహజం. అందునా కోతులకు, కుక్కలకు అస్సలే పడదు. కానీ ఓ వానరం జాతి వైరంకు సవాల్ విసిరింది. మాతృత్వం అన్న పదానికి జాతి వైరం అడ్డుకాదని చాటింది. తల్లి లేని ఓ కుక్క పిల్లను అక్కున చేర్చుకుంది. తన ఒడిలోకి తీసుకొని మాతృ ప్రేమను, ఆ మాధుర్యాన్ని పంచింది. గోదావరిఖని హనుమాన్ నగర్లోని సింగరేణి క్వార్టర్ ఏరియాలో శుక్రవారం మధ్యాహ్నం ఎండ తీవ్రతకు ఓ కుక్క పిల్ల బిక్కుబిక్కు మంటూ వానరం కంటపడింది.

ఇక అంతే ఆ వానరం జాతి వైరంను ప్రక్కనబెట్టింది. ఆ కుక్క పిల్లను తన ఒడిలోకి తీసుకొని ఓ ఇంటిపైకి తీసుకవెళ్లింది. కాసేపు చెట్టు నీడన కుక్క పిల్లను ఆడించింది. ఈ సంఘటన చూసేందుకు జనం గుమిగూడగా కోతి మాత్రం ఆ కుక్క పిల్లను వదలకుండా తన వెంట తీసుకవెళ్లింది. ఈ అరుదైన దృశ్యం అందరి హృదయాలను కదిలించింది. మానవ సంబంధాలు తగ్గిపోతున్న నేపథ్యంలో ఈ మూగ జీవి ప్రేమ కనువిప్పు కలిగించింది.