Bab el-Mandeb | ప్రపంచానికి ఇరాన్ మరో షాక్.. బాబ్ ఎల్ మాండెబ్ జలసంధిని కూడా మూసేస్తుందా..?

Bab el-Mandeb : హార్ముజ్ జలసంధి సమస్య తీరకముందే ఇరాన్ ప్రపంచానికి మరో షాకివ్వబోతున్నట్లు కనిపిస్తోంది. బాబ్ ఎల్ మాండెబ్ అనే మరో జలసంధిని కూడా ఇరాన్ మూసేస్తుందా అనే అనుమానాలు మొదలయ్యాయి.

Bab el-Mandeb : ఇప్పటికే హార్ముజ్ జలసంధిని ఇరాన్ మూసేయడం ద్వారా అనేక దేశాలు ఇబ్బంది పడుతున్న సంగతి తెలిసిందే. ప్రపంచ దేశాలకు చమురు సహా ఆహారం, ఎరువులు, ఇతర ఉత్పత్తుల రవాణా ఆగిపోయింది. హార్ముజ్ జలసంధిని ఓపెన్ చేసేందుకు అనేక దేశాలు ప్రయత్నిస్తున్నాయి. ఈ జలసంధి సమస్య తీరకముందే ఇరాన్ ప్రపంచానికి మరో షాకివ్వబోతున్నట్లు కనిపిస్తోంది. బాబ్ ఎల్ మాండెబ్ అనే మరో జలసంధిని కూడా ఇరాన్ మూసేస్తుందా అనే అనుమానాలు మొదలయ్యాయి.

దీనికి కారణం.. ఇరాన్ పార్లమెంట్ స్పీకర్ మహమ్మద్ బాగర్ గాలిబఫ్ చేసిన ట్వీట్. ‘‘బాబ్ ఎల్ మాండెబ్ అనే జలసంధి ద్వారా ప్రపంచానికి ఎంత చమురు, ఎల్‌ఎన్‌జీ, గోధుమలు, బియ్యం, ఎరువులు వంటివి రవాణా అవుతుంటాయి..? ఏ దేశం, ఏ సంస్థ ఈ జలసంధి నుంచి ఎక్కువ రవాణా చేస్తుంటాయి’’ అని ప్రశ్నిస్తూ ఆయన ఒక ట్వీట్ చేశారు. దీంతో ఇప్పుడు ఇరాన్ ఈ జలసంధిపై కూడా దృష్టిపెట్టిందా అనే అనుమానాలు మొదలయ్యాయి. ఇప్పటికే హార్ముజ్ కారణంగా ప్రపంచం చమురు సంక్షోభంలో పడింది. ఇది అనేక దేశాల ఆర్థిక వ్యవస్థపై కూడా ప్రభావం చూపుతోంది. చాలా దేశాల్లో ఆయిల్ దొరకడం లేదు. ఆహారోత్పత్తుల రవాణా ఆగిపోయింది. ఈ జలసంధి ఎప్పుడు పూర్తిస్థాయిలో అందుబాటులోకి వస్తుందో తెలియదు. అలాంటిది ఇప్పుడు ఇంకో మార్గాన్ని కూడా ఇరాన్ మూసేస్తే ప్రపంచం మరింత ఇబ్బంది పడుతుంది.

What share of global oil, LNG, wheat, rice, and fertilizer shipments transits the Bab-el-Mandeb Strait?

Which countries and companies account for the highest transit volumes through the strait? 🤔

— محمدباقر قالیباف | MB Ghalibaf (@mb_ghalibaf) April 3, 2026

ఆసియా, ఐరోపా, ఆఫ్రికా దేశాలు పెను సంక్షోభాన్ని ఎదుర్కొంటాయి. ఇటు హార్ముజ్, అటు బాబ్ ఎల్ మాండెబ్ జలసంధులు ప్రపంచ నౌకా రవాణాకు ఎంతో కీలకం. ఈ మార్గంలో 45 లక్షల బ్యారెళ్ల చమురు రవాణా అవుతుంది. ప్రపంచ వాణిజ్యంలో ఈ మార్గం వాటా 10-12 శాతం ఉంది. ప్రతి సంవత్సరం రూ.93.95 లక్షల కోట్ల విలువైన సరుకుల రవాణా ఈ జలసంధి నుంచే జరుగుతుంది. అలాంటిది యుద్ధం నేపథ్యంలో జలసంధిని మూసేస్తే ఈ మొత్తం వ్యాపారం స్తంభించడం ఖాయం. మరోవైపు ఇరాన్ యుద్ధాన్ని ఇంకా తీవ్రతరం చేస్తోంది. ఇరాన్ సైన్యం, తన అనుబంధ సైన్యం కలిసి వేవ్ 93 పేరుతో, ఆపరేషన్ ట్రూ ప్రామిస్ 4 ప్రారంభించాయి.