ఈ వారమే ఇరాన్‌ దాడి చేయొచ్చు

ఇజ్రాయెల్‌పై ఈ వారంలోనే ఇరాన్‌ లేదా దాని అనుకూల సంస్థలు దాడికి పాల్పడవచ్చని అమెరికా పేర్కొన్నది. ఈ మేరకు వైట్‌హౌజ్‌ అధికార ప్రతినిధి జాన్‌ ఎఫ్‌ కిర్బి కీలక ప్రకటన చేశారు.

• ఇజ్రాయెల్‌కు అమెరికా హెచ్చరిక

వాషింగ్టన్‌, ఆగస్టు 13: ఇజ్రాయెల్‌పై ఈ వారంలోనే ఇరాన్‌ లేదా దాని అనుకూల సంస్థలు దాడికి పాల్పడవచ్చని అమెరికా పేర్కొన్నది. ఈ మేరకు వైట్‌హౌజ్‌ అధికార ప్రతినిధి జాన్‌ ఎఫ్‌ కిర్బి కీలక ప్రకటన చేశారు. జూలై 31న టెహ్రాన్‌లో హమాస్‌ చీఫ్‌ ఇస్మాయెల్‌ హనియా హత్య, లెబనాన్‌లో హెజ్బొల్లా సీనియర్‌ కమాండర్‌ ఫౌడ్‌ షుక్‌న్రు ఇజ్రాయెల్‌ హతమార్చడంతో ఉద్రిక్తతలు పెరిగిన సంగతి తెలిసిందే.

తమ భూభాగంలో ఇజ్రాయెల్‌ సైనిక చర్యకు పాల్పడటంపై ఇరాన్‌ భగ్గుమంటున్నది. ఈ నేపథ్యంలో అమెరికా, యూకే, ఫ్రాన్స్‌, జర్మనీ, ఇటలీ వంటి దేశాధినేతలు ఉద్రిక్తతలను చల్లార్చి, ఇజ్రాయెల్‌, హమాస్‌ మధ్య కాల్పుల విరమణకు సహకరించాలని ఇరాన్‌ను కోరినా సానుకూల స్పందన రాలేదు.

టెల్‌ అవీవ్‌ లక్ష్యంగా హమాస్‌ రాకెట్ల దాడి

ఇజ్రాయెల్‌లోని ప్రధాన నగరం టెల్‌ అవీవ్‌ లక్ష్యంగా హమాస్‌ మంగళవారం దాడికి పాల్పడింది. రెండు ఎం90 రాకెట్లను ప్రయోగించింది. అయితే, ఒక రాకెట్‌ పేలుడు శబ్దం నగరంలో వినిపించిందని, ఎవరికీ గాయాలు కాలేదని స్థానిక మీడియా తెలిపింది. ఇంకో రాకెట్‌ మాత్రం ఇజ్రాయెల్‌ భూభాగంలోకి చేరుకోలేదని పేర్కొన్నది. కాగా, మంగళవారం గాజా స్ట్రిప్‌లోని దక్షిణ, మధ్య ప్రాంతాలను లక్ష్యంగా చేసుకొని ఇజ్రాయెల్‌ వైమానికదాడులకు పాల్పడింది. ఈ ఘటనలో 19 మంది పాలస్తీనా ప్రజలు మరణించినట్టు తెలుస్తున్నది.