Visit:
Donald Trump | వాషింగ్టన్‌: అక్రమ వలసదారులకు అమెరికా అధ్యక్షుడు డొనాల్డ్‌ ట్రంప్‌ ఓ ఆఫర్‌ ఇచ్చారు. స్వచ్ఛందంగా దేశం వీడాలనుకొనే వారికి విమాన టికెట్లు కొనిస్తాం, ఖర్చులకు కొంత డబ్బు కూడా ఇస్తామని ప్రకటించారు. మంగళవారం ఓ ఇంటర్వ్యూలో ఆయన మాట్లాడుతూ అమెరికాలో అక్రమ వలసదారులకు స్వచ్ఛందంగా దేశాన్ని వీడే కార్యక్రమాన్ని అమలు చేస్తున్నట్టు చెప్పారు. దీనిలో భాగంగా అలా వెళ్లేవారికి విమాన చార్జీలతో పాటు ఖర్చులకు కొంత మొత్తం ఇస్తామని చెప్పారు.
వారు మంచిగా ఉంటే, మేము వారిని తిరిగి దేశానికి తీసుకురావాలనుకుంటే, వీలైనంత త్వరగా వారిని దేశంలోకి తీసుకురావడానికి ప్రయత్నిస్తామని, భవిష్యత్‌లో వారితో కలిసి పనిచేస్తామని ట్రంప్‌ తెలిపారు. హోటళ్లు, పొలాలకు అవసరమైన కార్మికులను పొందడంలో సహాయం చేయాలనుకుంటున్నానని, అవసరమైన ఆ స్థానాలను భర్తీ చేయడానికి సిఫార్సు చేయాలనుకుంటున్నానని ఆయన చెప్పారు. ఇప్పుడు స్వచ్ఛందంగా వెళ్లిపోయిన వారే తమ దేశానికి అవసరమైనప్పుడు అధికారికంగా దేశంలోకి రావచ్చునని ట్రంప్‌ పేర్కొన్నారు.
