Vladimir Putin | రష్యా అధ్యక్షుడు వ్లాదిమిర్ పుతిన్కు ఆ దేశ పార్లమెంట్ బాసటగా నిలిచింది. ఉక్రెయిన్ వేర్పాటువాదులకు మద్దతుగా, దేశం ఆవల సైన్యం సేవలను వినియోగించేందుకు పుతిన్కు మద్దతుగా నిలిచింది. ఈ మేరకు పుతిన్ నిర్ణయానికి 153 మంది రష్యన్ సెనెటర్లు అంగీకారం తెలిపారు. ఒక్క సెనెటర్ కూడా వ్యతిరేకించడం గానీ, తటస్థంగా గానీ లేక పోవడం గమనార్హం. తూర్పు ఉక్రెయిన్లోకి సేనలను పంపేందుకు ప్రణాళికలు రూపొందించడం లేదని రష్యా విదేశాంగశాఖ ప్రకటించింది. కానీ, 2014 నుంచి ఉక్రెయిన్ ఆర్మీకి వ్యతిరేకంగా పోరాడుతున్న వేర్పాటువాదులకు మద్దతుగా ఆర్మీని ఉపయోగించేందుకు అనుమతించాలని ఫెడరేషన్ కౌన్సిల్ను పుతిన్ కోరారు.
రష్యా రక్షణశాఖ డిప్యూటీ మంత్రి నికొలాయ్ పాన్కోవ్ ఫెడరేషన్ కౌన్సిల్ సమావేశాల్లో మాట్లాడుతూ చర్చలు నిలిచిపోయాయి. ఉక్రెయిన్ ప్రభుత్వం హింసకు దిగడంతో రక్తపాతం జరుగుతున్నదని చెప్పారు. ఇటువంటి తరుణంలో రష్యాకు ఉక్రెయిన్ మరో చాయిస్ లేకుండా చేసిందన్నారు.
తూర్పు ఉక్రెయిన్లోని వేర్పాటువాదుల ఆధీనంలోని ప్రాంతాల (డీఎన్ఆర్, ఎల్ఎన్ఆర్) సరిహద్దుల్లో ఉక్రెయిన్ భారీగా ఆయుధాలతో నింపిన వాహనాలను మోహరించిందని పాన్కోవ్ ఆరోపించారు. ఉక్రెయిన్కు నాటో కూటమి అత్యాధునిక ఆయుధాలు పంపుతున్నదని చెప్పారు. ఇతర దేశాల సార్వభౌమత్వాన్ని కాపాడేందుకు రష్యా చర్యలు తీసుకుంటుందన్నారు.