లైవ్‌ గ్రెనేడ్‌లతో ఇంటిని అలంకరించిన వ్యక్తి.. విషయం తెలిసి పోలీసులు షాక్‌

రొటీన్‌ తనిఖీల సందర్భంగా ఆ ప్రాంత పోలీసులకు ఈ విషయం తెలిసింది. ఆ వ్యక్తి ఇంట్లో అలంకరించినవి లైవ్‌ గ్రెనేడ్లు అని గుర్తించి షాకయ్యారు. వాటిని తొలగించేందుకు బాంబ్ స్క్వాడ్ బృందాన్ని రప్పించారు.

లండన్‌: ఇళ్లను రకరకాల వస్తువులతో అందంగా అలంకరించేందుకు చాలా మంది ప్రయత్నిస్తుంటారు. తమ అభిరుచికి తగిన వస్తువులను కొని డెకరేట్‌ చేస్తుంటారు. అయితే ఒక వ్యక్తి ఏకంగా లైవ్‌ గ్రెనేడ్‌లతో ఇంటిని అలంకరించాడు. ఈ విషయం తెలుసుకున్న పోలీసులు షాకయ్యారు. వెంటనే బాంబ్‌ స్క్వాడ్‌ను రప్పించి లైవ్‌ గ్రెనేడ్‌లను తొలగించారు. విస్తూపోయే ఈ సంఘటన బ్రిటన్‌లో జరిగింది. సమ్మర్‌కోర్ట్‌లోని కార్న్‌వాల్ ప్రాంతానికి చెందిన ఒక వ్యక్తి తన ఇంటి అలంకరణ కోసం మూడు హ్యాండ్‌ గ్రెనేడ్‌లను కొనుగోలు చేశాడు. ఇంట్లోని ఒక చోట వాటితో డెకరేట్‌ చేశాడు.

కాగా, జనవరి 31న రొటీన్‌ తనిఖీల సందర్భంగా ఆ ప్రాంత పోలీసులకు ఈ విషయం తెలిసింది. ఆ వ్యక్తి ఇంట్లో అలంకరించినవి లైవ్‌ గ్రెనేడ్లు అని గుర్తించి షాకయ్యారు. వాటిని తొలగించేందుకు రాయల్ నేవీకి చెందిన ఎక్స్‌ప్లోజివ్ ఆర్డినెన్స్ డిస్పోజల్ బృందాన్ని రప్పించారు. ఈ సందర్భంగా ఆ రోజు ఉదయం 11.20 గంటల నుంచి మధ్యాహ్నం 2.30 గంటల వరకు ఆ ఇంటి సమీపంలోని రోడ్డును మూసివేశారు. అలాగే సేఫ్టీ కోసం పొరుగు ఇంట్లోని వారిని కూడా ఖాళీ చేయించారు.

అనంతరం బాంబ్ స్క్వాడ్ బృందం అన్ని జాగ్రత్తలు తీసుకుని మూడు లైవ్‌ గ్రెనేడ్‌లను ఆ ఇంటి నుంచి తొలగించింది. వాటిని దూరంగా తీసుకెళ్లి నిర్వీర్యం చేసింది. మరోవైపు ఇంటి అలంకరణ కోసం కొనుగోలు చేసిన గ్రెనేడ్లు పేలేవి అన్న సంగతి తనకు తెలియదని ఆ వ్యక్తి పోలీసులకు తెలిపాడు. ఈ నేపథ్యంలో ఆ వ్యక్తిపై ఎలాంటి చర్యలు తీసుకోవడం లేదని పోలీస్‌ అధికారి వెల్లడించారు.