నాపైనా రెండుసార్లు హత్యాయత్నం

ట్రంప్‌పై కాల్పుల ఘటనతో అమెరికా ఉలిక్కిపడింది. గతంలో తనపైనా రెండుసార్లు హత్యాయత్నాలు జరిగాయన్న సంగతిని ప్రపంచ కుబేరుడు, టెస్లా సీఈవో ఎలాన్‌ మస్క్‌ తాజాగా బయటపెట్టారు.

• ఎలాన్‌ మస్క్‌ వెల్లడి

వాషింగ్టన్‌, జూలై 14: ట్రంప్‌పై కాల్పుల ఘటనతో అమెరికా ఉలిక్కిపడింది. గతంలో తనపైనా రెండుసార్లు హత్యాయత్నాలు జరిగాయన్న సంగతిని ప్రపంచ కుబేరుడు, టెస్లా సీఈవో ఎలాన్‌ మస్క్‌ తాజాగా బయటపెట్టారు. టెక్సాస్‌లోని టెస్లా ప్రధాన కార్యాలయానికి సమీపంలో తుపాకులతో సంచరిస్తున్న ఇద్దరు వ్యక్తుల్ని అరెస్టు చేసినట్టు మస్క్‌ చెప్పాడు. ట్రంప్‌పై కాల్పుల ఘటన నేపథ్యంలో, మస్క్‌ భద్రతపై ‘ఎక్స్‌’ ఖాతాదారు ఒకరు ఆందోళన వ్యక్తం చేశారు.

‘దయచేసి.. మీ వ్యక్తిగత భద్రతను మూడింతలు చేయండి. ట్రంప్‌పై గన్‌ ఎక్కుపెట్టినవారు.. ఏదో ఒక రోజు మీపైకి కూడా వస్తారు’ అంటూ మస్క్‌ను హెచ్చరించాడు. దీనిపై స్పందించిన మస్క్‌, గత 8 నెలల్లో తనపై రెండుమార్లు హత్యాయత్నం జరిగిందన్న సంగతిని ‘ఎక్స్‌’లో చెప్పుకొచ్చారు. ఇదిలా ఉండగా, కాల్పుల ఘటనలో గాయపడ్డ ట్రంప్‌ త్వరగా కోలుకోవాలని మస్క్‌ ఆకాంక్షించారు.