Israel-Hamas War | ఇజ్రాయెల్ – హమాస్ (Israel-Hamas War) మధ్య భీకర యుద్ధం కొనసాగుతున్న వేళ.. అగ్రరాజ్యం అమెరికా (America) లో జాతి విద్వేష ఘటన చోటు చేసుకుంది. పాస్తీనియన్ – అమెరికన్ బాలుడు (Palestinian-American Boy), అతడి తల్లిపై 71 ఏళ్ల వృద్ధుడు పాశవికంగా దాడికి పాల్పడ్డాడు. ఈ దాడిలో బాలుడు ప్రాణాలు కోల్పోగా.. మహిళ తీవ్ర గాయాలపాలైంది. అమెరికాలోని ఇల్లినాయిస్ (Illinois)లో శనివారం ఈ ఘటన చోటు చేసుకుంది.
ఘటనకు సంబంధించి విల్ కౌంటీ షెరిఫ్ అధికారులు తెలిపిన వివరాల ప్రకారం.. 32 ఏళ్ల మహిళ తన ఆరేళ్ల కుమారుడితో కలిసి ఇల్లినాయిస్లోని ఓ ఇంట్లో అద్దెకుంటోంది. శనివారం ఉదయం తల్లీ కుమారుడిపై ఇంటి యజమాని 71 ఏళ్ల జోసఫ్ క్యూబా కత్తితో దాడికి పాల్పడ్డాడు. దీంతో ఆ మహిళ వెంటనే 911 కాల్ సెంటర్కు ఫోన్ చేసి కాపాడాల్సిందిగా పోలీసులను వేడుకుంది. దీంతో అప్రమత్తమైన పోలీసులు వెంటనే ఘటనాస్థలికి చేరుకున్నారు. అప్పటికే తల్లి, కుమారుడు రక్తపు మడుగుల్లో పడి కనిపించారు. వారిని వెంటనే ఆసుపత్రికి తరలించారు. అక్కడ పరీక్షించిన వైద్యులు బాలుడు మృతి చెందినట్టు నిర్ధారించారు. మహిళ పరిస్థితి మాత్రం విషమంగా ఉన్నట్లు తెలిపారు.
కాగా, బాలుడి శరీరంపై 26 కత్తిపోట్లు ఉన్నట్లు పోస్టుమార్టం రిపోర్ట్లో వెల్లడైంది. ఈ మేరకు కేసు నమోదు చేసుకున్న పోలీసులు జోసఫ్ క్యూబాను అరెస్ట్ చేశారు. అతడిపై జాతి విద్వేషం, హత్య అభియోగాలను నమోదు చేశారు. అయితే, బాధితుల పేర్లు, ఇతర వివరాలను అధికారులు వెల్లడించలేదు.
Also Read..
Joe Biden | గాజాను ఆక్రమించడం పెద్ద తప్పే.. ఇజ్రాయెల్కు బైడెన్ స్ట్రాంగ్ వార్నింగ్