Pakistan Astronaut: చైనా స్పేస్‌స్టేష‌న్‌కు వెళ్ల‌నున్న పాకిస్థానీ ఆస్ట్రోనాట్‌

Pakistan Astronaut: చైనా అంత‌రిక్ష కేంద్రానికి పాకిస్థానీ వ్యోమ‌గామి(Pakistan Astronaut) వెళ్ల‌నున్నారు. షెంజూ-24 వ్యోమ‌నౌక‌లో ఆ ఆస్ట్రోనాట్ ప్ర‌యాణిస్తారు. చైనీస్ స్పేస్ స్టేష‌న్‌కు వెళ్తున్న తొలి విదేశీ వ్య‌క్తిగా పాక్ ఆస్ట్రోనాట్ రికార్డు క్రియేట్ చేయ‌నున్నారు.

బీజింగ్‌: చైనా అంత‌రిక్ష కేంద్రానికి పాకిస్థానీ వ్యోమ‌గామి(Pakistan Astronaut) వెళ్ల‌నున్నారు. షెంజూ-24 వ్యోమ‌నౌక‌లో ఆ ఆస్ట్రోనాట్ ప్ర‌యాణిస్తారు. చైనీస్ స్పేస్ స్టేష‌న్‌కు వెళ్తున్న తొలి విదేశీ వ్య‌క్తిగా పాక్ ఆస్ట్రోనాట్ రికార్డు క్రియేట్ చేయ‌నున్నారు. అంత‌రిక్ష కేంద్రంలో స్వ‌ల్ప వ్య‌వ‌ధి పాటు ఆ ఆస్ట్రోనాట్ గ‌డ‌ప‌నున్నారు. షెంజూ-24 మిష‌న్‌కు చెందిన వివరాల‌ను చైనా అంత‌రిక్ష సంస్థ వెల్ల‌డించింది. అయితే వ్యోమ‌నౌక ప్ర‌యోగ తేదీని కానీ, లేక పాక్ వ్యోమ‌గామి ఎవ‌ర‌న్న‌దానిపై చైనా ప్ర‌క‌ట‌న చేయ‌లేదు. చైనా అంత‌రిక్ష చ‌రిత్ర‌లో తొలిసారి రెండు దేశాలు సంయుక్తంగా మిష‌న్ చేప‌ట్ట‌నున్నాయి. పాకిస్థానీ ఆస్ట్రోనాట్‌.. ఓ పేలోడ్ స్పెష‌లిస్టు త‌ర‌హాలో ఆ జ‌ర్నీలో ఉంటార‌ని చైనా మీడియా పేర్కొన్న‌ది. ప్ర‌స్తుతం చైనాలో ఇద్ద‌రు పాకిస్థానీ వ్య‌క్తులు వ్యోమ‌గాములుగా శిక్ష‌ణ పొందుతున్నారు. మొహ‌మ్మ‌ద్ జీషాన్ అలీ, ఖుర్రం దౌడ్‌.. చైనీస్ వ్యోమ‌గాముల‌తో శిక్ష‌ణ తీసుకుంటున్నారు. ఈ ఇద్ద‌రిలో ఒక‌రు చైనా అంత‌రిక్ష కేంద్రానికి వెళ్లే అవ‌కాశాలు ఉన్నాయి. 2025 ఫిబ్ర‌వ‌రిలో కుదిరిన అగ్రిమెంట్ ఆధారంగా ఈ మిష‌న్ చేప‌ట్ట‌నున్నారు.

పాకిస్థాన్ కూడా ఇటీవ‌ల త‌న స్పేస్ ప్రోగ్రామ్ గురించి వెల్ల‌డించింది. 2035 నాటికి చంద్రుడిపైకి వెళ్తామ‌ని మంత్రి అషాన్ ఇక్బాల్ తెలిపారు. పాకిస్థాన్ నిర్మిత లూనార్ రోవ‌ర్‌ను చైనాకు చెందిన ఛేంజ్‌-8 మిష‌న్ ద్వారా పంప‌నున్నారు. 2028లో ఈ ప్ర‌యోగం జ‌రిగే అవ‌కాశాలు ఉన్నాయి. మ‌రోవైపు చైనా మాత్రం 2030 నాటికి చంద్రుడిపై వ్యోమ‌గాముల‌ను దింపేందుకు ప్ర‌య‌త్నిస్తోంది. ఇక 2035 నాటికి భార‌త్ త‌న స్వంత స్పేస్ స్టేష‌న్ నిర్మించే ప్ర‌య‌త్నాలు కొన‌సాగిస్తోంది. చంద్రుడిపైకి 2040 నాటికి ఆస్ట్రోనాట్‌ను పంపేందుకు చూస్తోంది.