ద‌క్షిణాఫ్రికా దేశాధ్య‌క్ష పీఠంపై నెల్స‌న్ మండేలా.. చరిత్ర‌లో ఈరోజు

వర్ణవివక్షకు వ్యతిరేకంగా 27 ఏండ్ల‌పాటు జైలు శిక్ష అనుభవించి నెల్స‌న్ మండేలా దక్షిణాఫ్రికాకు అధ్యక్షుడిగా 1994 లో స‌రిగ్గా ఇదేరోజున‌ ఎన్నిక‌య్యారు.

May 10, 2021 / 01:14 PM IST

ద‌క్షిణాఫ్రికా దేశాధ్య‌క్ష పీఠంపై నెల్స‌న్ మండేలా.. చరిత్ర‌లో ఈరోజు

కెపెటౌన్ : వర్ణవివక్షకు వ్యతిరేకంగా 27 ఏండ్ల‌పాటు జైలు శిక్ష అనుభవించి నెల్స‌న్ మండేలా దక్షిణాఫ్రికాకు అధ్యక్షుడిగా 1994 లో స‌రిగ్గా ఇదేరోజున‌ ఎన్నిక‌య్యారు. మొదటి నల్లజాతి అధ్యక్షుడిగా దక్షిణాఫ్రికాలో కొత్త శకాన్ని ప్రకటించారు. మండేలా పుట్టినరోజును వర్ణవివక్ష నిర్మూలనకు చిహ్నంగా జరుపుకుంటారు.

నెల్స‌న్ మండేలా 1918 జూలై 18 న దక్షిణాఫ్రికాలోని బాసా నది ఒడ్డున ట్రాన్స్కిలోని మెర్వాజో గ్రామంలో జన్మించారు. ప్రజలు అతన్ని మాడిబా అని ఆప్యాయంగా పిలిచేవారు. వర్ణవివక్ష వ్యతిరేక జ‌రిపిన పోరాటంలో మండేలాను రాబెన్ ద్వీపంలో అప్ప‌టి ప్రభుత్వం 27 సంవత్సరాల‌పాటు జైలులో పెట్టింది. ఆ స‌మ‌యంలో ఆయ‌న‌ను బొగ్గు గనిలో పని చేయించారు. జైలులోని చాలా చిన్న‌ గదిలో ఉండి చాప మీద ప‌డుకుని జైలు జీవితాన్ని గ‌డిపారు.

జాతి వివ‌క్ష‌కు వ్య‌తిరేకంగా పోరాటాన్ని ప్రారంభించిన నెల్సన్ మండేలా.. గాంధీ మ‌హాత్ముడి మాదిరిగానే అహింసా మార్గంలోనే నిర‌స‌న‌లు కొన‌సాగించాడు. చివ‌ర‌కు ప్ర‌భుత్వం దిగిరాక త‌ప్ప‌లేదు. 27 ఏండ్ల జైలు జీవితం నుంచి ఆయ‌న‌కు విముక్తి క‌ల్పించింది. ఈయ‌న పుట్టిన‌రోజును ఐక్యరాజ్యసమితి సర్వసభ్య సమావేశం 2009 జూలై 18 న ‘మండేలా దినం’ గా ప్రకటించింది.

మండేలా సేవ‌ల‌కు గుర్తింపుగా 1990 లో భార‌త‌దేశ అత్యున‌త పుర‌స్కారం భార‌త‌ర‌త్న అందించి స‌త్క‌రించారు. భార‌తర‌త్న అందుకున్న తొలి విదేశీయుడుగా మండేలా చ‌రిత్ర సృష్టించారు. 1993 లో ఆయనకు శాంతి నోబెల్ బహుమతి లభించింది. 95 సంవత్సరాల వయసులో 2013 డిసెంబర్ 5 న అనారోగ్యం కారణంగా నెల్స‌న్ మండేలా మరణించారు.