ఇప్ప‌టికిప్పుడు భార‌తీయుల‌ను త‌ర‌లించే ఉద్దేశం లేదు : భార‌త విదేశాంగ శాఖ‌

ఉక్రెయిన్‌లోని భార‌తీయుల‌ను స్వ‌దేశానికి చేర్చే విష‌యంపై కేంద్ర విదేశాంగ శాఖ గురువారం కీల‌క ప్ర‌క‌ట‌న చేసింది. ఉక్రెయిన్‌లో ఉన్న భార‌తీయుల‌ను ఇప్ప‌టికిప్పుడు, హ‌డావుడిగా భార‌త దేశానికి తీసుకొచ్చే ఆలోచ‌న‌లేవీ లేవ‌ని విదేశాంగ శాఖ అధికార ప్ర‌తినిధి అరింద‌మ్ బాగ్చీ పేర్కొన్నారు. అయితే ఉక్రెయిన్‌లో జ‌రుగుతున్న వ్య‌వ‌హారాల‌ను మాత్రం ఎప్ప‌టిక‌ప్పుడు తెలుసుకుంటూనే వున్నామ‌ని, భ‌య‌ప‌డాల్సిన అవ‌స‌రం లేద‌ని భ‌రోసా క‌ల్పించారు.

‘ఉక్రెయిన్‌లో ఉండే భార‌తీయుల‌ను ఇప్ప‌టికిప్పుడు భార‌త్‌కు త‌ర‌లించే ఆలోచ‌న‌లు లేవు. దీంతో ప్ర‌త్యేక విమానాల‌కు ఎలాగూ ఆస్కార‌ముండ‌దు. క‌రోనా కార‌ణంగా విదేశాల‌కు అంత‌ర్జాతీయ‌ విమానాలు నడిపే విష‌యంలో కొన్ని ఒప్పందాలు జరిగాయి. వీటి ప్ర‌కారం కొన్ని ఆంక్ష‌లు, ప‌రిమితులు అమ‌లులో ఉన్నాయి. అయితే ప్ర‌స్తుత ప‌రిస్థితుల దృష్ట్యా… విమానాల సంఖ్య‌, ప్ర‌యాణికుల సంఖ్య‌పై ఉన్న ఆంక్ష‌ల‌ను ఎత్తేశాం. వీరిని తీసుకురావ‌డానికి ఇండియా- ఉక్రెయిన్ మ‌ధ్య ఛార్టెడ్ ఫ్లైట్ల‌ను ప్రోత్స‌హిస్తున్నాం’ అని అరిందం బాగ్చి వెల్ల‌డించారు.

ర‌ష్యా- ఉక్రెయిన్ మ‌ధ్య త‌లెత్తిన ప‌రిస్థితుల‌పై భార‌త్ మ‌రో సారి స్పందించింది. ఇరు దేశాల్లో ప‌రిస్థితులు మామూలు స్థితికి చేరుకోవ‌డానికి జ‌రుగుతున్న ప్ర‌య‌త్నాల‌ను తాము స్వాగ‌తిస్తున్న‌ట్లు విదేశాంగ శాఖ అధికార ప్ర‌తినిధి అరింద‌మ్ బాగ్చీ పేర్కొన్నారు. చ‌ర్చ‌ల ద్వారా, దౌత్యం ద్వారా స‌మ‌స్య ప‌రిష్కారం కావాల‌న్న‌దే త‌మ అభిమ‌త‌మ‌ని అరిందం బాగ్చీ స్ప‌ష్టం చేశారు.