ఒట్టావా, నవంబర్ 11: ‘నాటు నాటు నాటు నాటు నాటు నాటు వీరనాటు’.. అనేపాట ఇతడికి అచ్చంగా సరిపోతుంది. కెనడాకు చెందిన రన్నర్, పర్యావరణవేత్త ఆంటోని మోసెస్ (23) కేవలం 24 గంటల్లోనే 23,060 మొక్కలు నాటి ప్రపంచ రికార్డు సాధించాడు. కాప్-27లో భాగంగా ప్రపంచస్థాయి నేతలంతా వాతావరణ సవాళ్లను అధిగమించడంపై చర్చిస్తున్న నేపథ్యంలో ఆంటోని మోసెస్ వీడియో వైరల్గా మారింది. ఈ వీడియోను ప్రముఖ ప్రపంచ పర్యావరణవేత్త ఎరిక్ సోల్హెమ్ ట్విట్టర్లో షేర్ చేశారు. ఆ వీడియోలో ఆంటోని మోసెస్ కిందికి వంగి చకచకా గోతులు తవ్వుతూ మొక్కలు నాటుతూ వెళ్తున్నాడు. ఈ ఫీట్తో మోసెస్ 24 గంటల్లోనే అత్యధిక మొక్కలు నాటిన వ్యక్తిగా ప్రపంచ రికార్డు సాధించాడు. అంతకుముందు ఈ రికార్డు కెనడాకు చెందిన కెన్నీ చాప్లిన్ పేరుపైన ఉందని గిన్నిస్ సంస్థ తెలిపింది.