టెల్ అవీవ్: పాలస్తీనాలోని గాజాపై పట్టున్న హమాస్ మరోసారి ఇజ్రాయెల్ను టార్గెట్ చేసింది. ఆ దేశ రాజధాని టెల్ అవీవ్పై పెద్ద క్షిపణులతో ఆదివారం దాడి చేసింది. (Hamas Big Missile Attack) హమాస్ సాయుధ విభాగం అల్-ఖస్సామ్ బ్రిగేడ్స్ ఈ విషయాన్ని ప్రకటించింది. తమ పౌరులపై జియోనిస్ట్ (ఇజ్రాయెల్) మారణకాండకు ప్రతిస్పందనగా పెద్ద రాకెట్లను ప్రయోగించినట్లు టెలిగ్రామ్ ఛానెల్ ద్వారా వెల్లడించింది. గాజా స్ట్రిప్ నుంచే భారీ క్షిపణులను లాంచ్ చేసినట్లు హమాస్కు చెందిన అల్-అక్సా టీవీ పేర్కొంది.
కాగా, దక్షిణ గాజాలోని రఫా ప్రాంతం నుంచి హమాస్ కనీసం ఎనిమిది రాకెట్లను ప్రయోగించినట్లు బీబీసీ తెలిపింది. అయితే ఇజ్రాయెల్ ఆర్మీ ఈ రాకెట్లను అడ్డుకున్నదని పేర్కొంది. ఇజ్రాయెల్ సెంట్రల్ సిటీ టెల్ అవీవ్, హెర్జ్లియా, పెటా టిక్వాతో సహా పలు నగరాలు, పట్టణాలలో ప్రజలను హెచ్చరించే సైరన్లు మోగాయని వెల్లడించింది.
మరోవైపు హమాస్ తాజా దాడిలో ఇజ్రాయెల్కు ఎలాంటి నష్టం జరిగిందో అన్నది వెల్లడి కాలేదు. అయితే ఏడు నెలలుగా గాజాపై ఇజ్రాయెల్ దాడులు చేస్తున్నప్పటికీ ఆ దేశంపై రాకెట్లను ప్రయోగించే సత్తా తమకు ఉన్నదని హమాస్ తాజా దాడి సూచిస్తున్నది.