బిల్‌బోర్డ్స్‌లో బ్లూ ఫిల్మ్స్‌

పలు దేశాల్లో డిజిటల్‌ ప్రకటనల హోర్డింగ్‌లను హ్యాకర్లు తమ ఆధీనంలోకి తీసుకొని వాటిపై సాధారణ ప్రకటనలకు బదులుగా అశ్లీల వీడియోలను ప్రసారం చేయడం కలకలం రేపింది.

• పలు దేశాల్లో హ్యాకింగ్‌ కలకలం

కైరో, కౌలాలంపూర్‌: పలు దేశాల్లో డిజిటల్‌ ప్రకటనల హోర్డింగ్‌లను హ్యాకర్లు తమ ఆధీనంలోకి తీసుకొని వాటిపై సాధారణ ప్రకటనలకు బదులుగా అశ్లీల వీడియోలను ప్రసారం చేయడం కలకలం రేపింది. గత నెల 29న ఈజిప్ట్‌, మలేషియా, బ్రెజిల్‌, ఇరాక్‌, చైనాలో ఈ తరహా ఘటనలు జరిగాయి. ఈ పరిణామం డిజిటల్‌ ప్రకటనల వ్యవస్థల భద్రతపై ఆందోళన కలిగిస్తున్నది. ఈజిప్ట్‌లోని గిజా నగరంలో రద్దీ రహదారిపై ఏర్పాటుచేసిన భారీ ఎలక్ట్రానిక్‌ హోర్డింగ్‌పై అశ్లీల వీడియోలు ప్రసారమయ్యాయి. వాటిని చూసిన వాహనదారులు కొందరు తమ వాహనాలను ఆపి వాటిని వీడియోలు తీశారు. ఈ దృశ్యాలు సామాజిక మాధ్యమాల్లో వైరల్‌గా మారాయి.

ఈజిప్ట్‌ అంతర్గత వ్యవహారాల శాఖ తెలిపిన వివరాల ప్రకారం, ఆ హోర్డింగ్‌ను నిర్వహిస్తున్న సంస్థకు ప్రకటనల కంటెంట్‌ను అందించే ఓ అంతర్జాతీయ సంస్థ వెబ్‌సైట్‌పై సైబర్‌ దాడి జరిగింది. దాని ప్రభావంతో పలు దేశాల్లోని డిజిటల్‌ తెరలపై అనధికార కంటెంట్‌ ప్రసారమైనట్లు అధికారులు తెలిపారు. ఈ ఘటనలపై చట్టపరమైన చర్యలు ప్రారంభించినట్లు వెల్లడించారు. మలేషియాలోని జోహోర్‌ రాష్ట్రం క్లువాంగ్‌ పాంతంలో పలు ప్రభుత్వ ఎల్‌ఈడీ తెరలపై అసభ్యకర కంటెంట్‌ ప్రసారమైనట్లు స్థానిక మున్సిపల్‌ కౌన్సిల్‌ ధ్రువీకరించింది. బ్రెజిల్‌లోని కాంపో మయోర్‌ ప్రాంతంలోనూ ఓ డిజిటల్‌ ప్రకటనల తెరపైన అశ్లీల దృశ్యాలు కనిపించాయి.

రెండు గంటల్లోనే వేల వ్యవస్థలను హ్యాక్‌ చేశాం: లీకర్స్‌

లీకర్స్‌ పేరుతో టెలిగ్రామ్‌ చానల్‌ నిర్వహిస్తున్న హ్యాకర్ల బృందం ఈ దాడులకు తామే బాధ్యులమని ప్రకటించింది. ఎల్‌ఈడీ తెరలకు ప్రకటనల కంటెంట్‌ను పంపించే సాఫ్ట్‌వేర్‌లోని భద్రతా లోపాలను ఉపయోగించుకొని హ్యాకింగ్‌కు పాల్పడ్డామని పేర్కొన్నది. ఆటోమేటెడ్‌ స్కానింగ్‌ ద్వారా కేవలం రెండు గంటల్లోనే వేల సంఖ్యలో బలహీనమైన వ్యవస్థలను గుర్తించినట్లు వెల్లడించింది. ఈ దాడికి పెద్దగా సాంకేతిక నైపుణ్యం అవసరం లేదని, కనీస భద్రతా చర్యలు పాటించని వ్యవస్థలను సులభంగా ఆధీనంలోకి తీసుకోవచ్చని హ్యాకర్లు వ్యాఖ్యానించారు. అయితే, ఆ గ్రూప్‌ వారే సైబర్‌ దాడికి పాల్పడినట్టు ధ్రువీకరణ లేదు.