ఫ్రాన్స్‌లో నిరసనల వెల్లువ లక్షలాది మంది భారీ మార్చ్‌

పాఠశాలల నిధులు, విపరీతంగా పెరిగిన జీవన వ్యయం తదితర సమస్యలపై ఫ్రాన్స్‌ రాజధాని ప్యారిస్‌తోపాటు దేశవ్యాప్తంగా లక్షలాదిమంది ప్రజలు శనివారం రోడ్లపైకి వచ్చి తీవ్ర నిరసన తెలిపారు.

ప్యారిస్‌: పాఠశాలల నిధులు, విపరీతంగా పెరిగిన జీవన వ్యయం తదితర సమస్యలపై ఫ్రాన్స్‌ రాజధాని ప్యారిస్‌తోపాటు దేశవ్యాప్తంగా లక్షలాదిమంది ప్రజలు శనివారం రోడ్లపైకి వచ్చి తీవ్ర నిరసన తెలిపారు. గత నెలలో ఉపాధ్యాయుల కొరతతో చిన్న స్థాయిలో ప్రారంభమైన ఈ ఆందోళన ఇప్పుడు దేశవ్యాప్తంగా వేల సంఖ్యలో విద్యార్థులు, కార్మికులను కలుపుకుని పెద్ద ఉద్యమంలా మారింది.

విద్యారంగంలో సంస్కరణలు, ఎక్కువ వేతనాలు, పెన్షన్ల పెంపు కోసం ప్రజలు డిమాండ్‌ చేస్తుండగా, ఉపాధ్యాయుల కొరత వల్ల పాఠశాలల్లో బోధనా గంటలు భారీగా వృథా అవుతున్నాయని విద్యాశాఖ గణాంకాలు చెబుతున్నాయి.

గతవారాంతంలో జరిగిన అల్లర్లను దృష్టిలో ఉంచుకుని ప్రభుత్వం దేశవ్యాప్తంగా 70,000 మంది పోలీసులను మోహరించింది. నిరసనకారులను అణచివేసేందుకు ప్యారిస్‌తో పాటు లియోన్‌, స్ట్రాస్‌బోర్గ్‌, తదితర నగరాల్లో పోలీసులు బాష్పవాయువు, వాటర్‌ కెనాన్లను ప్రయోగించారు. దేశవ్యాప్తంగా 64 మందిని పోలీసులు అరెస్ట్‌ చేశారు. వీరిలో ఆరుగురు మైనర్లు కూడా ఉన్నారు.