55 బ్యాటరీలు మింగిన మహిళ… ఆపరేషన్‌ చేసి తొలగించిన వైద్యులు

కడుపులో నొప్పితో తీవ్ర ఇబ్బంది పడిన ఆ మహిళను డబ్లిన్‌లోని సెయింట్ విన్సెంట్స్ యూనివర్శిటీ హాస్పిటల్‌కు తరలించారు. అక్కడి వైద్యులు ఎక్స్‌ రే తీయగా ఆమె పొత్తి కడుపు, పేగుల్లో చిన్న సైజు బ్యాటరీలు ఉన్నట్లు గుర్తించారు.

డబ్లిన్‌: ఒక మహిళ ఏకంగా 55 బ్యాటరీలు మింగి ఆత్మహత్యకు యత్నించింది. అవి ఆమె కడుపు, పేగుల్లో చిక్కుకున్నాయి. దీంతో వైద్యులు ఆపరేషన్‌ చేసి ఆ బ్యాటరీలను తొలగించారు. ఇంత పెద్ద సంఖ్యలో బ్యాటరీలను సర్జరీ ద్వారా తొలగించడం ఇదే తొలిసారి అని డాక్టర్లు తెలిపారు. ఐర్లాండ్‌ దేశంలో ఈ సంఘటన జరిగింది. 66 ఏళ్ల మహిళ తనకు తాను హాని తలపెట్టుకోవాలని భావించింది. ఏఏ, ఏఏఏ సైజు బ్యాటరీలు 55 మింగింది. అవన్నీ ఆమె కడుపులో, పెద్ద, చిన్న పేగుల్లో ఇరుక్కున్నాయి.

కాగా, కడుపులో నొప్పితో తీవ్ర ఇబ్బంది పడిన ఆ మహిళను డబ్లిన్‌లోని సెయింట్ విన్సెంట్స్ యూనివర్శిటీ హాస్పిటల్‌కు తరలించారు. అక్కడి వైద్యులు ఎక్స్‌ రే తీయగా ఆమె పొత్తి కడుపు, పేగుల్లో చిన్న సైజు బ్యాటరీలు ఉన్నట్లు గుర్తించారు. అయితే అదృష్టవశాత్తు ఆ బ్యాటరీల వల్ల ఆమె జీర్ణకోశం దెబ్బతినలేదని వైద్యులు చెప్పారు.

పొత్తు కడుపు వద్ద సర్జరీ చేసిన వైద్యులు తొలుత 46 బ్యాటరీలు తొలగించారు. పెద్ద పేగు, చిన్న పేగుల్లో ఇరుకున్న బ్యాటరీలను ఇతర వైద్య విధానాల ద్వారా బయటకు తీశారు. అయితే ఒకేసారి ఇన్ని బ్యాటరీలు మింగిన సంఘటన ఇదేనని ఆ వైద్యులు తెలిపారు. ఐరిష్ మెడికల్ జర్నల్‌లో ఈ నివేదికను గురువారం ప్రచురించినట్లు సైన్స్‌ అలెర్ట్‌ పేర్కొంది.