Biodiesel | వాడేసిన వంట నూనెతో బయోడీజిల్‌.. గంట సేపటి లోపే తయారీ పూర్తి!

వాడిన వంట నూనెతో బయోడీజిల్‌ను తయారు చేసే సరికొత్త పద్ధతిని అమెరికాలోని కాలిఫోర్నియా యూనివర్సిటీకి చెందిన రసాయన శాస్త్రవేత్తలు అభివృద్ధి చేశారు.

• అమెరికా శాస్త్రవేత్తల సరికొత్త ప్రయోగం

Biodiesel | న్యూయార్క్‌, నవంబర్‌ 9: వాడిన వంట నూనెతో బయోడీజిల్‌ను తయారు చేసే సరికొత్త పద్ధతిని అమెరికాలోని కాలిఫోర్నియా యూనివర్సిటీకి చెందిన రసాయన శాస్త్రవేత్తలు అభివృద్ధి చేశారు. వృథా వంటనూనె, సోడియం టెట్రామెథాక్సిబోరేట్‌ కలిపి ఈ బయోడీజిల్‌ను తయారు చేశారు. కేవలం గంట సేపటి లోపే బయోడీజిల్‌ తయారీ పూర్తవుతుందని చెప్పారు. కేవలం 40 డిగ్రీల ఉష్ణోగ్రతతో వేడి చేస్తే చాలని, నీటిని వేడి చేసే కంటే తక్కువ ఉష్ణోగ్రత సరిపోతుందని తెలిపారు.

ఈ బయోడీజిల్‌ తయారీకి రీఫైనరీలు కూడా అవసరం లేదని, సులువుగా తయారుచేయవచ్చని చెప్పారు. దీని ద్వారా డబ్బు, విద్యుత్తు ఆదా అవుతుందని తెలిపారు. పారిశ్రామిక అవసరాల కోసం కూడా ఈ బయోడీజిల్‌ను ఉపయోగించవచ్చని చెప్పారు. ఈ బయోడీజిల్‌కు సంబంధించిన వివరాలు ‘ఎనర్జీ అండ్‌ ఫ్యుయెల్స్‌’ అనే జర్నల్‌లో ప్రచురితమయ్యాయి.