అంద‌మైన బీచ్‌తో అమ్మ‌కానికి ఓ ఊరు.. ధ‌ర కేవ‌లం రూ.1.28 కోట్లు

లండ‌న్‌: ఇది చ‌ద‌వ‌గానే.. ఏంటీ జోక్ చేస్తున్నారా అని మీరు అనుకోవ‌చ్చు. హైదరాబాద్‌లోని మంచి ఏరియాలో ఫ్లాట్ కొనాల‌న్నా స‌రిపోని ఈ మాత్రం డ‌బ్బుతో ఓ ఊరేంటి? అంద‌మైన బీచేంటి అన్న డౌట్ మీకు రావ‌చ్చు. కానీ ఇది నిజ‌మే. స్కాట్లాండ్‌లో ఈ ఊరిని అమ్మ‌కానికి పెట్టారు. కేవ‌లం 1,73,000 డాలర్లు (రూ.1,28,91,700 మాత్ర‌మే)కే అమ్మ‌కానికి ఈ ఊరు సిద్ధంగా ఉంది. ఈ ఊళ్లో ఇప్పుడు ఎవ‌రూ లేరు. ఒక్క దెయ్యం త‌ప్ప‌. అవును.. ఇక్క‌డ ఓ దెయ్యం ఉన్న‌ట్లు అక్క‌డి వాళ్లు న‌మ్ముతారు. ఓల్డ్ విలేజ్ ఆఫ్ లాయ‌ర్స్ అనే ఈ ఊరు 3.31 ఎక‌రాల విస్తీర్ణంలో ఉంది. దీనికి ప్ర‌త్యేకంగా ఓ ప్రైవేట్ బీచ్ కూడా ఉంది. దీనిని కొన్న‌వాళ్లు అక్క‌డ చేప‌లను కూడా ప‌ట్టుకునేందుకు అనుమ‌తి ఇస్తారు.

ఏంటీ ఊరు క‌థ‌?

ఈ ఊరు 17వ శ‌తాబ్దంనాటిది. ఇక్క‌డ లేడీ ఆఫ్ లాయ‌ర్స్ అనే ఓ జ్యోతిష్యురాలి ఇల్లు ఉంది. ఇప్ప‌టికే ఆమె దెయ్యంలా మారి ఇక్క‌డే తిరుగుతున్న‌ట్లు అక్క‌డి వాళ్లు న‌మ్ముతారు. అప్ప‌ట్లో ఆమె అంచ‌నా వేసిన అన్ని విష‌యాలూ నిజ‌మ‌య్యేవ‌ని చెబుతారు. ఇక్క‌డ ఆమె ఓ బూడిద చెట్టును నాటింద‌ని, అది లిటిల్ స్పైర్ (ఓ ర‌కం మొక్క‌) అంత ఎత్తుకు ఎదిగిన‌ప్పుడు అక్క‌డ ఉన్న చ‌ర్చి కూలిపోతుంద‌ని ఆమె చెప్పింద‌ట‌.

ఆ త‌ర్వాతి కాలంలో నిజంగానే ఓ పెను తుఫాను ధాటికి అక్క‌డి చ‌ర్చి ధ్వంస‌మైంది. ఆ బూడిద చెట్టు కూడా లేకుండా పోయింది. అప్ప‌టి నుంచీ ఆ చ‌ర్చిని, ఇంటిని ఎవ‌రూ ఉప‌యోగించ‌లేదు. 1841 జ‌నాభా లెక్క‌ల ప్ర‌కారం ఈ గ్రామంలో 17 మంది ఉండేవారు. 1891 వ‌చ్చేసరికి వీరి సంఖ్య ఏడుకు తగ్గింది. 1926 నుంచి ఇక్క‌డ ఒక్క‌రు కూడా లేరు.