సీజన్స్‌ హాస్పిటల్‌ ఎదుట సిబ్బంది వంటావార్పు

బాగ్‌అంబర్‌పేట, వైభవ్‌నగర్‌లో గల సీజన్స్‌ హాస్పిటల్‌ సిబ్బంది తమ పెండింగ్‌ జీతాల కోసం వినూత్న నిరసనకు దిగారు.

అంబర్‌పేట, నవంబర్‌ 5 :బాగ్‌అంబర్‌పేట, వైభవ్‌నగర్‌లో గల సీజన్స్‌ హాస్పిటల్‌ సిబ్బంది తమ పెండింగ్‌ జీతాల కోసం వినూత్న నిరసనకు దిగారు. హాస్పిటల్‌ ముందు వంటావార్పు చేపట్టి ఆందోళన చేశారు. గత రెండు నెలలుగా దవాఖాన మూసివేసి ఉందని, అంతకుముందు నుంచే 50 మందికి పైగా సిబ్బందికి నాలుగునెలల వేతనాలు పెండింగ్‌లో ఉన్నాయని తెలిపారు. మొత్తం సుమారు రూ.60లక్షల జీతాలు చెల్లించాలిస ఉందని ఆవేదన వ్యక్తం చేశారు.

దవాఖాన మూసివేసే ముందు సిబ్బంది మొత్తం పలుమార్లు ధర్నా చేసినా జీతాలు చెల్లించలేదని వాపోయారు. దిక్కుతోచని స్థితిలో ఇక్కడ వంటావార్పుతో నిరసన చేపట్టామన్నారు. నెలరోజుల్లో జీతాలు చెల్లిస్తామని డాక్టర్‌ దేవేందర్‌రెడ్డి ఇచ్చిన హామీ ఇప్పటివరకు అమలు కాలేదని ఆరోపించారు. తమకు రావాల్సిననన పెండింగ్‌ వేతనాలను వెంటనే చెల్లించాలని డిమాండ్‌ చేశారు.