దవాఖానల్లో మందుల్లేవ్‌!

వైద్య విధాన పరిషత్‌ పరిధిలోని పలు ఆరోగ్య కేంద్రాలు, జిల్లా దవాఖానల్లో మందుల కొరత వేధిస్తున్నది.

• ప్రభుత్వ ఆరోగ్య కేంద్రాల్లో కొరత
• డాక్టర్‌ రాసిన మందులు.. బయట కొనండి
• రోగులకు సూచిస్తున్న సిబ్బంది

సిటీబ్యూరో: వైద్య విధాన పరిషత్‌ పరిధిలోని పలు ఆరోగ్య కేంద్రాలు, జిల్లా దవాఖానల్లో మందుల కొరత వేధిస్తున్నది. మందుల కొరతపై రోగులు నిలదీస్తే వారిని సముదాయించేందుకు అక్కడి సిబ్బంది నానా తంటాలు పడుతున్నారు. మరికొందరు సిబ్బంది ‘డాక్టర్‌ రాసిన మందుల్లేవ్‌.. అవి బయట కొనండి’.. అంటూ సూటిగానే చెబుతున్నారు. దీంతో రోగులకు, అక్కడి సిబ్బందికి మధ్య వాగ్వాదం తలెత్తి కొన్ని సార్లు గలాటకు దారితీస్తున్నట్లు స్వయంగా ఆయా కేంద్రాల ఫార్మసీ సిబ్బందే వాపోతున్నారు.

సాధారణంగా ప్రతి మూడు నెలలకు ఒకసారి ఆయా ఆరోగ్య కేంద్రాలకు అక్కడి రోగుల సామర్థ్యానికి సరిపోను మందులను సరఫరా చేయాలి. అయితే ప్రతి మూడు నెలలకు ఒకసారి రావాల్సిన క్వార్టర్లీ డ్రగ్స్‌ కోటా ఎప్పటికప్పుడు విడుదల కావడం లేదని, దీని వల్ల మందుల కొరత ఏర్పడుతున్నట్లు అధికారులు చెబుతున్నారు.

గోల్కొండ ఏరియా వైద్యశాలలో..

గోల్కొండ ఏరియా హాస్పిటల్‌లో ప్రతి రోజూ దాదాపు వెయ్యి మంది వరకు ఓపీ రోగులు చికిత్స కోసం వస్తుంటారు. అయితే దవాఖానకు సరిపోను మందుల కోటా సకాలంలో విడుదల కాకపోవడంతో లోకల్‌ పర్చేజ్‌ కింద కొన్ని రకాల అత్యవసర మందులు, ఇతరాత్ర మందులను కొనుగోలు చేస్తారు. కానీ కొన్ని రోజులుగా మందులు సరఫరా చేసే సప్లయర్లకు బిల్లులు చెల్లించకపోవడంతో వారు మందుల సరఫరాను నిలిపివేశారని దవాఖాన వర్గాలు చెబుతున్నాయి. దీంతో అటు టీఎస్‌ఎంఐడీసీ సరఫరా చేయకపోవడం, ఇటు సప్లయర్లు మందుల సరఫరాను నిలిపివేయడంతో గోల్కొండతో పాటు నాంపల్లి తదితర ఏరియా దవాఖానలు, కమ్యూనిటీ హెల్త్‌ సెంటర్లలో మందుల కొరత ఉందంటున్నారు.

ప్రభుత్వ ఆరోగ్య కేంద్రాలలో సాధారణంగా ఉండాల్సిన కనీసం మందులు కూడా లేకపోవడంతో రోగులు ఇబ్బందులకు గురవుతున్నారు. అయితే మందుల కొరతను కప్పిపుచ్చుకొనేందుకు కొందరు సిబ్బంది ప్రత్యామ్నాయ చర్యల కింద మొక్కుబడి మందులు కట్టబెడుతున్నారనే ఆరోపణలు వినిపిస్తున్నాయి. వాటి వల్ల ఎలాంటి లాభం ఉండదని తెలిసినా.. రోగులు అమాయకులే కదా వారికేం తెలుస్తుందనే ధోరణితో వ్యవహరిస్తున్నారు. సీపీఎం, బీ-కాంప్లెక్స్‌ వంటి మందులే కాకుండా జలుబు, దగ్గు, ఇన్‌ఫెక్షన్స్‌కు సంబంధించిన చిన్నపాటి మందులు కూడా అందుబాటులో లేకపోవడంపై రోగులు ఆగ్రహం వ్యక్తం చేస్తున్నారు.

ఆధార్‌ ఉంటేనే ఓపీ చీటి

ఆధార్‌ తప్పనిసరి కాదని.. ఇప్పటికే అనేకసార్లు సుప్రీం కోర్టు, కేంద్ర ప్రభుత్వం చెప్పినా.. తెలంగాణ వైద్య, ఆరోగ్యశాఖలో మాత్రం సిబ్బంది తీరు మారడం లేదు. దీనిపై ఇటీవలే రాష్ట్ర హైకోర్టులో కూడా పిటీషన్‌ దాఖలు కావడంతో విచారించిన న్యాయస్థానం.. ఆధార్‌ లేకపోతే చికిత్స ఇవ్వరా అని ప్రభుత్వంపై ఆగ్రహం వ్యక్తం చేసిన విషయం తెలిసిందే. గ్రేటర్‌లోని అన్ని దవాఖానల్లో ఆధార్‌ లేనిదే ఓపీ చీటి ఇవ్వడం లేదని రోగులు వాపోతున్నారు. కొన్ని సార్లు దూర ప్రాంతాల నుంచి వచ్చిన వారు ఆధార్‌ తీసుకురాకపోవడంతో వారిని సిబ్బంది వెనక్కి పంపిస్తున్నారు. సీహెచ్‌సీలు, పీహెచ్‌సీలు, యూపీహెచ్‌సీల్లోనూ ఆధార్‌ లేనిదే ఓపీ ఇవ్వడం లేదని రోగులు చెబుతున్నారు.