బస్తీల మధ్య బాహాబాహీ

బంజారాహిల్స్‌, నవంబర్‌ 12 : ఫిలింనగర్‌ డివిజన్‌ పరిధిలోని 300 గజాల ప్రభుత్వ స్థలంపై తలెత్తిన వివాదం రెండు బస్తీల మధ్యన చిచ్చుపెట్టింది. సుమారు 30 ఏళ్లుగా తమ బస్తీ అవసరాల కోసం వినియోగిస్తున్న స్థలంలో పక్క బస్తీకి చెందిన వ్యక్తులు షెడ్డు నిర్మాణానికి ప్రయత్నించడంతో వివాదం ప్రారంభమైనది.

• ఫిలింనగర్‌లో 300 గజాల ప్రభుత్వ స్థలంపై గొడవ

• షెడ్డు వేసేందుకు జ్ఞానీజైల్‌సింగ్‌నగర్‌ వాసుల యత్నం

బంజారాహిల్స్‌, నవంబర్‌ 12 : ఫిలింనగర్‌ డివిజన్‌ పరిధిలోని 300 గజాల ప్రభుత్వ స్థలంపై తలెత్తిన వివాదం రెండు బస్తీల మధ్యన చిచ్చుపెట్టింది. సుమారు 30 ఏళ్లుగా తమ బస్తీ అవసరాల కోసం వినియోగిస్తున్న స్థలంలో పక్క బస్తీకి చెందిన వ్యక్తులు షెడ్డు నిర్మాణానికి ప్రయత్నించడంతో వివాదం ప్రారంభమైనది. రెండు బస్తీలకు చెందిన వ్యక్తులు బాహాబాహీకి దిగడంతో పోలీసులు రంగ ప్రవేశం చేయాల్సి వచ్చింది. వివరాల్లోకి వెళ్తే..ఫిలింనగర్‌ రోడ్‌ నం 9లోని అంబేద్కర్‌నగర్‌ బస్తీలో సుమారు 300గజాల ఖాళీ ప్రభుత్వ స్థలం ఉంది. 30 ఏళ్ల క్రితమే అప్పటి ప్రభుత్వ హయాంలో సుమారు మూడెకరాల విస్తీర్ణంలో ఈ బస్తీని ఏర్పాటు చేసి లే అవుట్‌ సైతం ఇవ్వగా ఈ ఖాళీ స్థలం కూడా అంబేద్కర్‌నగర్‌కు చెందినదే అని స్పష్టంగా పేర్కొన్నారు. కాగా ఈ స్థలంలో స్థానికుల అవసరాల కోసం కమ్యూనిటీహాల్‌ నిర్మించాలని ఎన్నోఏళ్లుగా డిమాండ్‌ చేస్తున్నారు.

సుమారు 10వేల జనాభా కలిగిన తమ బస్తీలో సమావేశాలు పెట్టుకోవాలన్నా, చిన్న ఫంక్షన్లు చేసుకోవాలన్నా కమ్యూనిటీహాల్‌ లేదని, అంగన్‌వాడీకి సొంత భవనం లేదని ఈ స్థలంలో భవనం కట్టాలని ఎన్నో ఏళ్లుగా ప్రయత్నాలు చేస్తున్నా ఫలితం దక్కలేదు. ఇదిలా ఉండగా ఖాళీగా ఉన్న ఈ స్థలాన్ని అనుకుని అంజనేయస్వామి ఆలయం ఉంది. కాగా రెండు బస్తీలకు చెందిన భక్తులు ఈ ఆలయంలో పూజలు చేస్తుంటారు. కాగా కొన్నేండ్లుగా ఈ ఖాళీ స్థలంలో కొంతమంది అయ్యప్ప మాలధారులు 40 రోజుల అయ్యప్ప దీక్ష సమయంలో తాత్కాలిక నివాసం ఏర్పాటు చేసుకునేవారు. అయితే ఇటీవల అంజనేయస్వామి ఆలయంతో పాటు పక్కనున్న 300 గజాల స్థలం మీద కూడా జ్ఞానీజైల్‌సింగ్‌నగర్‌కు చెందిన బస్తీనేతలు అజమాయిషీ చేయడం వివాదాన్ని రాజేసింది.

జ్ఞానీజైల్‌సింగ్‌నగర్‌ బస్తీలో కమ్యూనిటీహాల్‌, మహిళాభవన్‌, అంగన్‌వాడీ కేంద్రాలు ఉన్నాయని, తమ బస్తీలో కమ్యూనిటీహాల్‌ సైతం లేదని, ఇలాంటి పరిస్థితిలో ఉన్న 300 గజాల స్థలాన్ని సొంతం చేసుకునేందుకు జ్ఞానీజైల్‌సింగ్‌నగర్‌కు చెందిన నేతలు ప్రయత్నాలు చేస్తున్నారంటూ అంబేద్కర్‌నగర్‌ బస్తీవాసులు మండిపడ్డారు. ఈ క్రమంలో ఇటీవల అంబేద్కర్‌నగర్‌కు చెందిన స్థలంలో పక్క బస్తీకి చెందిన అయ్యప్పస్వాములు శాశ్వత షెడ్డును నిర్మించేందుకు ప్రయత్నించడంతో స్థల వివాదం కాస్తా రెండు బస్తీల మధ్యన గొడవగా మారింది. ఎట్టిపరిస్థితిల్లో ఈ స్థలంలో షెడ్డు నిర్మించేందుకు అంగీకరించేది లేదని అంబేద్కర్‌నగర్‌ వాసులు అభ్యంతరం వ్యక్తం చేస్తున్నారు.

మాజీ ఎమ్మెల్యే దానం నాగేందర్‌, షేక్‌పేట మండల అధికారులు, ఫిలింనగర్‌ పోలీసులకు రెండు బస్తీల నేతలు ఫిర్యాదులు చేసుకుంటుండడంతో పాటు ప్రతిరోజు గొడవలు జరుగుతున్నాయి. గురువారం ఉదయం రెండు బస్తీలకు చెందిన స్థానికులు పరస్పరం దూషణలకు దిగడంతో పరిస్థితి ఉద్రిక్తంగా మారింది. దీంతో ఫిలింనగర్‌ పోలీసులు రంగంలోకి దిగి పరిస్థితిని అదుపులోకి తీసుకువచ్చారు. ఇరువర్గాలకు చెందిన వారు పెద్ద సంఖ్యలో పోలీస్‌స్టేషన్‌కు చేరుకుని మరోసారి వాగ్వాదానికి దిగారు. ఫిలింనగర్‌లోని 18 బస్తీల్లో ఇలాంటి దౌర్జన్యం ఎక్కడా లేదని, ఎవరి బస్తీకి చెందిన స్థలంలో ఆ బస్తీకి చెందిన వారు కార్యక్రమాలు చేసుకుంటారు తప్ప పక్క బస్తీవాళ్లు వచ్చి పెత్తనం చేయడం సరికాదని అంబేద్కర్‌నగర్‌ బస్తీవాసులు ఆగ్రహం వ్యక్తం చేస్తున్నారు.

ఈ సమస్యను పరిష్కరించాల్సిన నేతలు రాజకీయాలు చేస్తూ ప్రజల మధ్యన చిచ్చుపెడుతున్నారని, కొంతమంది నేతల స్వార్థం కోసం రెండు బస్తీల మధ్యన గొడవలు పెంచుతున్నారని, ఇలాంటి ప్రయత్నాలు మానుకోకపోతే ఫిలింనగర్‌లో శాంతి భద్రతల సమస్యలు తలెత్తే అవకాశం ఉందని స్థానికులు ఆభిప్రాయపడుతున్నారు.