లంచాలకు మరిగారా!

హైదరాబాద్‌లో పోలీసుల తీరుపై సీపీలు గరమయ్యారు. హైదరాబాద్‌ పోలీసు కమిషనరేట్‌ పరిధిలో కేవలం వారం రోజుల్లో మూడు ఘటనలు, అవి కూడా పోలీసుల దారిదోపిడీ, బెదిరింపులకు పాల్పడడం వంటివి కావడంతో సీపీ సజ్జనార్‌ మంగళవారం కమిషనరేట్‌ అధికారులతో నిర్వహించిన టెలీ కాన్ఫరెన్స్‌లో సీరియస్‌ అయ్యారు.

• పీఎస్‌ వ్యవస్థ కంట్రోల్‌ తప్పింది

• వరుస ఘటనలపై హైదరాబాద్‌, మల్కాజిగిరి సీపీలు గరం గరం

• హైదరాబాద్‌ దోపిడీ వ్యవహారాన్ని సీరియస్‌గా తీసుకున్న సీపీ సజ్జనార్‌

• కీసరలో లంచాల ఘటనపై ఆగ్రహం వ్యక్తం చేసిన సీపీ సుమతి

• పోలీసు అధికారులతో టెలీకాన్ఫరెన్స్‌ నిర్వహించిన కమిషనర్‌

• లాంగ్‌ స్టాండింగ్‌ హోంగార్డులను వేరే చోటికి పంపాలని ఆదేశం

సిటీబ్యూరో, నవంబర్‌ 10 (నమస్తే తెలంగాణ): హైదరాబాద్‌లో పోలీసుల తీరుపై సీపీలు గరమయ్యారు. హైదరాబాద్‌ పోలీసు కమిషనరేట్‌ పరిధిలో కేవలం వారం రోజుల్లో మూడు ఘటనలు, అవి కూడా పోలీసుల దారిదోపిడీ, బెదిరింపులకు పాల్పడడం వంటివి కావడంతో సీపీ సజ్జనార్‌ మంగళవారం కమిషనరేట్‌ అధికారులతో నిర్వహించిన టెలీ కాన్ఫరెన్స్‌లో సీరియస్‌ అయ్యారు. అదే విధంగా కీసరలో వరుసగా రెండుసార్లు ఏసీబీకి పోలీసులు లక్షల లంచం తీసుకుంటూ పట్టుబడడంతో మల్కాజిగిరి సీపీ సుమతి కూడా అధికారులపై ఆగ్రహం వ్యక్తం చేశారు. రెండు కమిషనరేట్లలో కొందరు పోలీసుల ప్రవర్తన, వారి చర్యలు కమిషనరేట్లకే తలవంపులు తెచ్చేలా ఉన్నాయని, ఇలా జరిగితే తాము సహించేది లేదని, కచ్చితంగా ప్రతి ఒక్కరూ బాధ్యతాయుతంగా, క్రమశిక్షణతో, నిజాయితీగా పనిచేయాలన్నారు.

పరిస్థితిని చక్కదిద్దేందుకు స్టేషన్‌ అధికారులు ఎప్పటికప్పుడు తమ పరిధిలో అధికారాలన్నీ వినియోగించుకుని అవసరమైతే ఎక్కడా రాజీ పడకుండా అక్రమార్కుల విషయాలను తమ దృష్టికి తీసుకురావాలంటూ.. ఇరువురు కమిషనర్లు తమ అధికారులకు సూచించారు. ప్రధానంగా ఇటీవల జూబ్లీహిల్స్‌ జోన్‌లోనే ఎక్కువగా ఇలాంటి దోపిడీలు, ముడుపులకు సంబంధించిన వ్యవహారాలు జరగడంతో సీపీ సజ్జనార్‌ ఆ జోన్‌ అధికారులతో ప్రత్యేకంగా మాట్లాడి అసలు జోన్‌లో ఏం జరుగుతుందో క్షేత్రస్థాయిలో పర్యవేక్షించాలని, ఒకరిద్దరు అధికారులు వేరే కేసులతో బిజీగా ఉంటే వారి బాధ్యతలు ఎవరు నిర్వర్తిస్తున్నారో తెలుసుకోవాలంటూ సూచించారు. చాలా ముఖ్యమైన ప్రాంతంలో ఇటువంటి అక్రమాలు జరగడంతో తమకు చాలా ఇబ్బందిగా ఉంటుందన్నదని సీపీ టెలీకాన్ఫరెన్స్‌లో చెప్పారు.

పీఎస్‌ల ముందు దుకాణాలు తెరిచారా..!

హైదరాబాద్‌లో వరుసగా జరుగుతున్న సంఘటనలపై సీపీ సజ్జనార్‌ ఆగ్రహం వ్యక్తం చేశారు. ముఖ్యంగా గత వారం రోజుల్లోనే మూడు ఘటనలు అవి కూడా సామాన్యుల దగ్గర డబ్బులు బలవంతంగా తీసుకున్న పోలీసుల తీరును ఎండగట్టారు. ఫిల్మ్‌నగర్‌ పోలీసులు ఏం చేస్తున్నారని, అసలు దారిదోపిడీ చేసే స్థాయిలో లూఠీ జరుగుతున్నదంటే వ్యవస్థ పూర్తిగా కంట్రోల్‌ తప్పిందంటూ సజ్జనార్‌ అన్నారు. సైఫాబాద్‌లో వెహికల్‌ చెకింగ్‌ పేరుతో చిన్నచిన్న వసూళ్లు, సనత్‌నగర్‌ బండి గుంజుకుని పోవడం.. ఇదంతా ఏంటంటూ ఆయన ప్రశ్నించారు. ఈ మూడు ఘటనలతో హైదరాబాద్‌ పోలీసు కమిషనరేట్‌కే చెడ్డ పేరు తెచ్చారని, అసలు కమిషనరేట్‌లో స్టేషన్‌ అధికారులకు ఆయా స్టేషన్‌లు కంట్రోల్‌లో ఉన్నాయా అంటూ అడిగారు. ఇటీవల తాను ఓ ఫంక్షన్‌కు వెళ్తే..అక్కడ తెలిసిన వాళ్లు కొందరు తనతో మాట్లాడారని.. ‘మీ వాళ్లు..మా దగ్గరికి వచ్చి మేం నలుగురం ఉన్నాం.. పటాకులు కావాల’ని అడిగారంటూ..చెబితే..

తనకు తలకొట్టేసినట్లయిందని ఆవేదన వ్యక్తం చేశారు. ‘మీరు పోలీసులయి ఉండి ఈ రకంగా బెగ్గింగ్‌కు దిగడం ఏమాత్రం బాగలేదు’ అని.. అడుక్కుని తింటూ.. ఉద్యోగాలు చేయాల్సిన అవసరం లేదంటూ.. సీపీ మండిపడ్డారు. పెట్రోలింగ్‌కు ఎవరు వెళ్తున్నారు.. మీ స్టేషన్‌లో పనిచేస్తున్న వారు స్టేషన్‌ముందే దుకాణాలు పెట్టుకుని డబ్బులు వసూలు చేస్తుంటే ఎస్‌హెచ్‌వోలు ఏం చేస్తున్నారంటూ ఫైరయ్యారు. పరిస్థితి కంట్రోల్‌ తప్పిందంటే.. అందుకు కారణం పై స్థాయి అధికారులేనని, దీనిపై ప్రతీ ఒక్కరూ సమాధానం చెప్పాల్సిన అవసరం ఉందన్నారు.

ఈ మూడు ఘటనల్లో ఒక దగ్గర హోంగార్డు ఒకరు పది సంవత్సరాల నుంచి ఒకేచోట పనిచేస్తున్నారని, అలా పనిచేస్తున్న పరిస్థితి స్థానిక పీఎస్‌లో తెలిసి కూడా ఎందుకు అతనిని వేరే దగ్గరికి పంపించలేదని ఆ ఎస్‌హెచ్‌వోను అడిగారు. హోంగార్డులు లాంగ్‌స్టాండింగ్‌ ఉంటే వారిని వెంటనే మార్చాలని, ఎట్టి పరిస్థితుల్లో వారిని సమయాన్ని దాటి ఉంచొద్దంటూ ఆదేశించారు. కమిషనరేట్‌లో కొందరు అక్రమార్కుల వల్ల నిజాయితీగా పనిచేసేవారికి కూడా చెడ్డపేరు వస్తున్నదని, పోలీసులంటే ఇలాగే ఉంటారా అంటూ ప్రజలు అనుకునే పరిస్థితులు తీసుకురావద్దంటూ హితవు పలికారు. ఈ టెలీకాన్ఫరెన్స్‌లో ఎస్‌బీ జాయింట్‌ కమిషనర్‌ విజయ్‌కుమార్‌, అన్ని స్టేషన్లకు సంబంధించిన ఇన్‌స్పెక్టర్లతో పాటు ఉన్నతాధికారులు పాల్గొన్నారు.

మల్కాజిగిరిలో..!

మల్కాజిగిరి పోలీసు కమిషనరేట్‌ పరిధిలో వరుసగా జరుగుతున్న పరిణామాలపై పోలీసు కమిషనర్‌ సుమతి తీవ్ర ఆగ్రహం వ్యక్తం చేశారు. ముఖ్యంగా కమిషనరేట్‌ పరిధిలోని సిబ్బంది పనితీరు, ఇటీవల వెలుగుచూసిన అవినీతి అక్రమాలపై సీరియస్‌ అయ్యారు. కీసర పీఎస్‌ పరిధిలో సబ్‌ఇన్‌స్పెక్టర్‌ శ్రీనివాస్‌ చార్జిషీట్‌ దాఖలు చేయడానికి రూ. 2 లక్షల లంచం తీసుకుంటూ.. ఏసీబీకి చిక్కడం, రెండు నెలల కిందట ఇదే పోలీసుస్టేషన్‌లో మరో పోలీసు అధికారి రూ.5లక్షల లంచం తీసుకుంటూ పట్టుబడడం కలకలం రేపుతోంది. దీంతో ఆమె క్షేత్రస్థాయి పోలీసు అధికారులు, సిబ్బందితో మాట్లాడారు. పీఎస్‌లలో ఏం జరుగుతున్నదంటూ ఆరా తీశారు.