Minister Srinivas Yadav | 50ఏళ్లలో జరగని అభివృద్ధి పదేళ్లలో చేశాం : తలసాని

Minister Srinivas Yadav | దేశ రక్షణ కోసం తమ ప్రాణాలను పణంగాపెట్టి ఎదురొడ్డి పోరాడే సైనికుల్లో అత్యధికులు సిక్కులేనని మంత్రి తలసాని శ్రీనివాస్‌ యాదవ్‌ అన్నారు. అమీర్‌పేటలోని అతిథి హోటల్‌లో శుక్రవారం అమీర్‌పేట సిక్కు సమాజ్‌ ఆధ్వర్యంలో ఏర్పాటు చేసిన దసరా మిలన్‌ సమావేశం జరిగింది.

Minister Srinivas Yadav | దేశ రక్షణ కోసం తమ ప్రాణాలను పణంగాపెట్టి ఎదురొడ్డి పోరాడే సైనికుల్లో అత్యధికులు సిక్కులేనని మంత్రి తలసాని శ్రీనివాస్‌ యాదవ్‌ అన్నారు. అమీర్‌పేటలోని అతిథి హోటల్‌లో శుక్రవారం అమీర్‌పేట సిక్కు సమాజ్‌ ఆధ్వర్యంలో ఏర్పాటు చేసిన దసరా మిలన్‌ సమావేశం జరిగింది. ఈ సందర్భంగా పలువురు సిక్కు సమాజ్‌ ప్రతినిధులు సమస్యల పరిష్కారం కోసం ఎంతో కృషి చేసిన మంత్రి తలసాని యాదవ్‌కు మద్దతు తెలిపారు. తలసాని అంటేనే అభివృద్ధి అని.. సనత్‌నగర్‌ నియోజకవర్గాన్ని ఎంతో అభివృద్ధి చేసి నిరూపించారంటూ ప్రశంసించారు.

ఈ ఎన్నికల్లో సిక్కు సమాజ్‌ మొత్తం తలసాని శ్రీనివాస్‌కేనంటూ ఏకగ్రీవంగా ప్రకటించారు. అనంతరం మంత్రి తలసాని మాట్లాడుతూ రాష్ట్ర ఏర్పాటు తర్వాత సీఎం కేసీఆర్‌ నాయకత్వంలో అనేక అభివృద్ధి పనులు, సంక్షేమ కార్యక్రమాలు అవుతున్నాయన్నారు. నియోజకవర్గ పరిధిలో 50ఏళ్లలో జరగని అభివృద్ధిని పదేళ్లలో చేశామని వివరించారు. సీఎంగా పని చేసిన మర్రి చెన్నారెడ్డి సైతం ఎలాంటి అభివృద్ధి చేయలేదని.. ఆయన తర్వాత కొడుకు ఎన్నికల అనంతరం ప్రజలకు అందుబాటులో ఉండేవారు కాదన్నారు.

సమస్యల పరిష్కారం కోసం తన వద్దకు వచ్చిన వారు ఎవరైనా పార్టీలకు అతీతంగా అవసరమైన సాయాన్ని అందిస్తున్న విషయాన్ని గుర్తుచేశారు. గురుద్వార్ వద్ద పార్కింగ్ సౌకర్యం లేక ఇబ్బందులుపడుతున్నామని తన దృష్టి తీసుకొచ్చిన వెంటనే నాలాపై స్లాబ్ ఏర్పాటు చేసి పార్కింగ్ సౌకర్యం కల్పించినట్లు వివరించారు. గ్రేవ్ యార్డ్ వివాదాన్ని పరిష్కరించి రూ.4.50కోట్ల వ్యయంతో అభివృద్ధి చేసినట్లు వివరించారు. 20సంవత్సరాలుగా అత్తాపూర్‌లో ఎన్నో సంవత్సరాల నుంచి నివసిస్తున్న సిక్కులకు తెలంగాణ రాష్ట్రం వచ్చిన తర్వాతనే ఇండ్ల పట్టాలను పంపిణీ చేసినట్లు వివరించారు.

ఇక్కడి ప్రజల ఓట్లతో ఎంపీగా ఎన్నికై కేంద్రమంత్రిగా పని చేస్తున్న కిషన్‌రెడ్డి నాలుగున్నరేళ్లలో ఒక్కరోజైనా ప్రజల వద్దకు వచ్చారా? అంటూ ప్రశ్నించారు. కేవలం ఎన్నికల సమయంలో మాత్రమే ప్రజల వద్దకు వస్తారని.. తర్వాత అడ్రస్ ఉండదన్నారు. కార్యక్రమంలో మాజీ కార్పొరేటర్ నామన శేషుకుమారి, గురుద్వార్ అధ్యక్షులు బాగిందర్ సింగ్, మాజీ మైనార్టీ కమిషన్ సభ్యులు సురేందర్ సింగ్, దర్శన్ సింగ్, అజ్జి సింగ్, నరేందర్ సింగ్, లాహోర్ సింగ్, టిల్లు సింగ్, ఆనంజిత్ కౌర్, గురుదీప్ సింగ్, సుమిత్ సింగ్ పాల్గొన్నారు.