KCR | కేసీఆర్ను ఎవ్వరు కలిసినా ఆత్మీయంగా మాట్లాడుతారు. నేను ఎప్పుడు వెళ్లినా ఇంట్లో కుటుంబ సభ్యుడి మాదిరిగా భోజనం చేద్దామంటారు. మాకు కోఠిలోని తాజ్మహల్ హోటల్ ఎదురుగా 1947లో స్వదేశీ ఖాదీ వస్ర్తాలయం ఉండేది. అప్పుడు మా నాన్న బిజ్జ మాణిక్యం ఆ వస్ర్తాలయం చూసుకునేవాడు. అప్పుడు నా వయస్సు 18 ఏండ్లు. కేసీఆర్ సార్ మా దుఖానానికి వస్తుండేవారు. నాన్నతో మాట్లాడుతూ ఖాదీల ప్రాధాన్యతపై చర్చిస్తుండేవారు. నాతోనూ మాట్లాడేవాడు.
ఆయన మొదట్నుంచి ఫ్యూర్ ఖాదీకి అత్యంత ప్రాధాన్యతనిస్తారు. 1985లో మా నాన్న మాణిక్యం చనిపోయాక మా ఇంటికి వచ్చి కేసీఆర్ మమ్మల్ని పరామర్శించారు. అనంతరం మేం హైదర్గూడలో 1991 నుంచి శ్రీ సాయి ఖాదీ వస్ర్తాలయం ప్రారంభించాం. ఇప్పటికీ కేసీఆర్కు మేమే దుస్తులు కుట్టి ఇస్తాం. నెలకు 30 జతలకు పైగా దుస్తులు పంపిస్తుంటాం.
ఎప్పుడు తీసుకెళ్లినా అవి ధరించి చాలా బాగున్నాయంటూ ప్రశంసిస్తుంటారు. 20 ఏండ్ల క్రితం మేం కుట్టి ఇచ్చిన దుస్తులను ఇప్పటికీ జాగ్రత్తగా కాపాడుకున్నారు. ఎలక్షన్స్ సమయంలో 150 దుస్తులు కుట్టి తీసుకెళ్లి అందించాం. ఇప్పుడు నా కొడుకు సతీశ్ కేసీఆర్ దుస్తుల బాధ్యతలు చూసుకుంటున్నాడు. సీఎంగా ఉన్న సమయంలో మా దుకాణానికి వచ్చారు. నా కొడుకు, కూతురు వివాహాలకు హాజరయ్యారు. కేసీఆర్ తెలంగాణ తెచ్చిన వ్యక్తి. ఆ పేరొక్కటి చాలు చరిత్రలో నిలిచేందుకు. కేసీఆర్కు పుట్టిన రోజు శుభాకాంక్షలు. ఆ భగవంతుడి ఆశీస్సులు తనకెప్పుడూ ఉంటాయి.
-సిటీబ్యూరో, ఫిబ్రవరి 17 (నమస్తే తెలంగాణ)