Zoo park | జూపార్క్‌లో కొమ్ముల గుడ్లగూబ‌ దత్తత

చార్మినార్ : అద్భుతమైన జూ పార్క్​‍ అందాలు మళ్లీమళ్లీ పిలిచేట్లుగా ఉన్నాయని సీని నటుడు సూర్యతేజ తెలిపారు. శుక్రవారం ఆయన పాతనగరంలోని జూ పార్క్​‍ను సందర్శించారు. జూలోని ఎన్‌క్లోజర్‌లలో ఉన్న‌ జంతువుల పరిరక్షణతో పాటు వన్యప్రాణి రక్షణ, పర్యావరణ రక్షణ కోసం జూ అధికారులు తీసుకుంటున్న కృషిని చూసి ప్రత్యేకంగా అధికారుల పనితీరును ప్రశంసించారు.

జూలో చేపడుతున్న పలు అభివృద్ది పనులతోపాటు జంతు దత్తత కార్యక్రమాల వివరాలను నటుడు సూర్యతేజకు జూ పార్క్​‍ క్యూరేటర్‌ రాజశేఖర్‌ వివరించారు. ఈ సందర్భంగా సూర్యతేజ జూ పార్క్​‍లోని నిశాచర ఎన్‌క్లోజర్‌లలోని గ్రేట్‌ ఇండియన్‌ హోర్నేడ్‌ ఓల్‌ ( కొమ్ముల గుడ్లగూబ‌) ను సంవత్సరం పాటు దత్తత తీసుకోవడానికి ముందుకు వచ్చారు.

వెంటనే జూ అధికారులు దత్తత ప్రక్రియను పూర్తిచేసి వివరాలను సూర్యతేజకు అందించారు. ఈ సందర్భంగా జూ పార్క్​‍ క్యూరేటర్‌ రాజశేఖర్‌ మాట్లాడుతూ జూలోని సంతువులను దత్తత తీసుకోవడానికి జంతు ప్రేమికులతోపాటు కార్పొరేట్‌ కంపెనీ ప్రతినిధులు, వీఐపీలు, సెలబ్రేటీలు ముందుకు రావాలని విజ్ఞప్తి చేశారు.

జంతు పరిరక్షణతోపాటు పర్యావరణ సంరక్షణలోనూ ప్రతి ఒక్కరు భాగస్వాములు కావాలని విజ్ఞప్తి చేశారు. అనంతరం నటుడు సూర్యతేజ‌ క్యూరేటర్‌ రాజశేఖర్‌కు గ్రేట్‌ ఇండియన్‌ హోర్నేడ్‌ ఓల్‌ దత్తతకు సంబంధించిన సంవత్సర ఖర్చులకు సంబంధించిన 20వేల రూపాయలను అందించారు.