Visit:
ఎల్బీనగర్‌, నవంబర్‌ 30 : ట్రాఫిక్‌ కానిస్టేబుల్‌పై ఓ యువకుడు దాడి చేశాడు. ఈ సంఘటన సరూర్‌నగర్‌ పోలీస్‌స్టేషన్‌ పరిధిలో చోటు చేసుకుంది. ఆలస్యంగా వెలుగుచూసిన ఈ ఘటనలో ట్రాఫిక్‌ కానిస్టేబుల్‌ కంటికి గాయమయ్యింది. సరూర్‌నగర్‌ సీఐ సైదిరెడ్డి కథనం ప్రకారం ఎల్బీనగర్‌ ట్రాఫిక్‌ పోలీస్‌స్టేషన్‌కు చెందిన కానిస్టేబుల్‌ అప్పారావు నవంబర్‌ 26వ తేదీన కొత్తపేట చౌరస్తాలో ట్రాఫిక్‌ విధులు నిర్వహిస్తున్నాడు. ఆ సమయంలో అక్కడికి వచ్చిన భరత్‌ అనే యువకుడిని అప్పారావు ఆపి హెల్మెట్‌ లేకుండా ప్రయాణిస్తున్నావంటూ చాలాన్‌ విధించాడు.
దీంతో ఇరువురి మద్య వాగ్వివాదం జరిగింది. అనంతరం ఆ ప్రాంతం నుండి వెళ్లిపోయిన భరత్‌ మరో 15 నిమిషాల తర్వాత మరలా వచ్చి ఓ రాయితో కానిస్టేబుల్‌ అప్పారావుపై దాడి చేశాడు. ఈ ఘటనలో అప్పారావు కంటికి తీవ్ర గాయం అయ్యింది. వెంటనే తోటి పోలీస్‌ సిబ్బందితో పాటుగా స్థానికులు కానిస్టేబుల్‌ అప్పారావును సమీపంలోని ఓమ్ని హాస్పిటల్‌లో చేర్పించారు. అక్కడే ఉన్న స్థానికులు, పోలీస్‌ సిబ్బంది భరత్‌ను పట్టుకుని సరూర్‌నగర్‌ పోలీసులకు అప్పగించారు. ఈ మేరకు నిందితుడిని అరెస్టు చేసి కేసును దర్యాప్తు చేస్తున్నారు.
