జోరుగా ఇండ్ల విక్రయాలు

హైదరాబాద్‌ మహానగరంలో 2023 సంవత్సరంలో నెలవారి ఇండ్ల విక్రయాలు గతేడాదితో పోల్చుకుంటే మెరుగైన వృద్ధి రేటు నమోదైందని నైట్‌ ఫ్రాంక్‌ ఇండియా శుక్రవారం విడుదల చేసిన నివేదికలో పేర్కొంది.

• హైదరాబాద్‌లో.. నెలవారి ఇండ్ల విక్రయాల్లో మెరుగైన వృద్ధి
• నవంబర్‌లో రూ.3741 కోట్ల విలువ చేసే స్థిరాస్తుల విక్రయం
• గతేడాదికంటే 12 శాతం అధికం
• నైట్‌ ఫ్రాంక్‌ ఇండియా నివేదికలో వెల్లడి

సిటీబ్యూరో, డిసెంబర్‌ 15 (నమస్తే తెలంగాణ) : హైదరాబాద్‌ మహానగరంలో 2023 సంవత్సరంలో నెలవారి ఇండ్ల విక్రయాలు గతేడాదితో పోల్చుకుంటే మెరుగైన వృద్ధి రేటు నమోదైందని నైట్‌ ఫ్రాంక్‌ ఇండియా శుక్రవారం విడుదల చేసిన నివేదికలో పేర్కొంది. 2022లో జనవరి నుంచి నవంబర్‌ నాటికి మొత్తం 11నెలల్లో అంతకు ముందు ఏడాదితో పోల్చితే (-9 శాతం)లోటు వృద్ధి రేటు నమోదు కాగా, 2023 జనవరి నుంచి నవంబర్‌ నాటికి 11నెలల్లో నమోదైన వృద్ధి రేటు 2022 ఏడాది కంటే 12శాతంగా అధికంగా ఉన్నదని వెల్లడించింది.

ఈ ఏడాది (2023) నవంబర్‌ నెలలో మొత్తం 6268 రెసిడెన్షియల్‌ ప్రాపర్టీస్‌ రిజిస్ట్రేషన్‌ కాగా, వాటి మొత్తం రిజస్ట్రేషన్‌ విలువ రూ.3741 కోట్లుగా ఉన్నదని నైట్‌ ఫ్రాంక్‌ ఇండియా నివేదికలో వివరించింది. ఇందులో రూ.25లక్షల నుంచి 50 లక్షల విలువ చేసే ఆస్తులు 48శాతం ఉండగా, రూ.50 -75 లక్షల విలువ చేసే ఆస్తుల విలువ 17శాతం, రూ.75 లక్షల నుంచి రూ.1కోటి విలువ చేసే ఆస్తులు 9 శాతం, రూ.కోటి నుంచి 2 కోట్ల విలువ చేసే ఆస్తుల విలువ 10 శాతం, రూ.2 కోట్ల కంటే ఎక్కువ విలువ చేసే ఆస్తులు 3 శాతంగా 2023లో నమోదైందని పేర్కొన్నారు.