Visit:
Sugar | చ‌క్కెర.. ఇది లేకుండా మ‌నం అస‌లు ఉండలేము. నిత్యం ఏదో ఒక రూపంలో దీన్ని తీసుకుంటూనే ఉంటాము. ఉద‌యం నిద్ర లేస్తే తాగే కాఫీ, టీ మొద‌లు రాత్రి తాగే పాల వ‌ర‌కు చాలా మంది చక్కెరను తీసుకుంటారు. కానీ చక్కెరను అతిగా తీసుకోవ‌డం ఆరోగ్యానికి హాని చేస్తుంద‌ని ఆరోగ్య నిపుణులు హెచ్చ‌రిస్తున్నారు. చ‌క్కెర మ‌న నిత్య జీవితంలో ఒక భాగం అయిపోయింది. కానీ దీన్ని తీసుకోకుండా ఉంటే అనేక లాభాలు పొంద‌వ‌చ్చ‌ని వారు అంటున్నారు. క‌నీసం నెల రోజుల పాటు క‌ఠినంగా చ‌క్కెర లేని డైట్‌ను పాటించాల‌ని, అప్పుడు చ‌క్కెర అంటేనే వ‌ద్దు అనే భావ‌న‌కు వ‌స్తార‌ని అంటున్నారు. అయితే చ‌క్కెర తినే అల‌వాటును మానుకోవ‌డం అంత సుల‌భం ఏమీ కాద‌ని వారు చెబుతున్నారు.
చ‌క్కెర తిన‌డాన్ని మానుకుంటే మ‌న శరీరంలో అనేక మార్పులు సంభ‌విస్తాయి. ముఖ్యంగా ప్రారంభంలో తీపి ప‌దార్థాలు అంటే యావ ఎక్కువ‌గా ఉంటుంది. వాటిని తిన‌లేక‌పోతున్నామ‌నే భావ‌న క‌లుగుతుంది. ఈ ద‌శ‌లో టెంప్ట్ అయ్యారంటే మ‌ళ్లీ క‌థ మొద‌టికి వ‌స్తుంది. క‌నుక చక్కెరను ఈ ద‌శ‌లో ఎంత వీలైతే అంత వ‌ర‌కు నియంత్రించాల్సిందే. అప్పుడే పాజిటివ్ ఫ‌లితాలు వ‌స్తాయి. త‌రువాత కొంద‌రికి త‌ల‌నొప్పి కూడా వ‌స్తుంది. తీపి తిన‌లేక‌పోతున్నామ‌నే ఆందోళ‌న కార‌ణంగా వ‌చ్చే ఒత్తిడి అది. అందుక‌నే త‌ల‌నొప్పి వ‌స్తుంది. క‌నుక ఇలా జ‌రిగినా కూడా విచారించ‌కూడ‌దు. అలాగే చ‌క్కెర తీసుకోవ‌డం మానేసిన వారిలో అల‌స‌ట, శ‌క్తి స్థాయిలు త‌గ్గిన‌ట్లు అనిపిస్తుంది. ఇది కూడా మామూలు విష‌య‌మే అని వైద్య నిపుణులు అంటున్నారు.
చ‌క్కెర తీసుకోవ‌డం మానేస్తే కొంద‌రికి విసుగు వ‌స్తుంది. ప్ర‌తి విష‌యానికి చికాకు ప‌డుతుంటారు. ఏకాగ్ర‌త లోపిస్తుంది. జ్ఞాప‌క‌శ‌క్తి త‌గ్గిన‌ట్లు ఫీల‌వుతారు. వికారంగా కూడా అనిపిస్తుంది. నిద్ర ప‌ట్ట‌దు. ఆందోళ‌న కూడా ఉంటుంది. ఇవ‌న్నీ చ‌క్కెర మానేసిన ఆరంభంలో క‌నిపించే ల‌క్ష‌ణాలు. వీట‌న్నింటినీ త‌ట్టుకుని స్థిమితంగా ఉంటే అద్భుత‌మైన ఫ‌లితాలు ఉంటాయ‌ని వైద్యులు చెబుతున్నారు. చ‌క్కెర మానేసిన త‌రువాత కొద్ది రోజుల‌కు ఆయా ల‌క్ష‌ణాలు కూడా పూర్తిగా త‌గ్గిపోతాయి. అప్పుడు మీ శరీరంలో అస‌లు మార్పులు మొద‌ల‌వుతాయి. ముఖ్యంగా శ‌రీరంలోని కొవ్వు క‌రుగుతుంది. బ‌రువు త‌గ్గుతారు. శ‌రీరంలోని శ‌క్తి స్థాయిలు పెరుగుతాయి. మీరు అంత‌కు ముందు ఎన్న‌డూ లేనంత యాక్టివ్‌గా ఫీల‌వుతారు.
చ‌క్కెర తీసుకోవ‌డం మానేశాక షుగ‌ర్ లెవ‌ల్స్ పూర్తిగా కంట్రోల్‌లోకి వ‌చ్చేస్తాయి. డ‌యాబెటిస్ అదుపులో ఉంటుంది. టైప్ 2 డ‌యాబెటిస్ ఉన్న‌వారు అయితే మ‌రికొద్ది రోజుల‌కు డాక్ట‌ర్ స‌ల‌హాతో మెడిసిన్‌ను తీసుకోవ‌డం క్ర‌మంగా మానేయ‌వ‌చ్చు కూడా. అలాగే అధ్య‌య‌నాలు చెబుతున్న ప్ర‌కారం చ‌క్కెర తిన‌డం మానేసిన వారికి గుండె జ‌బ్బులు వ‌చ్చే అవ‌కాశాలు చాలా త‌క్కువ‌గా ఉంటాయ‌ని తేలింది. చ‌క్కెర తీసుకోవ‌డం ఆపేస్తే చ‌ర్మం కూడా మ‌ర‌మ్మ‌త్తుల‌కు గుర‌వుతుంది. చ‌ర్మ క‌ణాలు డ్యామేజ్ అవ‌కుండా ర‌క్షించ‌బ‌డ‌తాయి. దీంతో వృద్ధాప్య ఛాయ‌లు త‌గ్గి య‌వ్వ‌నంగా క‌నిపిస్తారు. ముఖం కాంతివంతంగా మారి మెరుస్తుంది. దంతాలు ఆరోగ్యంగా ఉంటాయి. ఒత్తిడి, ఆందోళ‌న ఉండ‌వు. లివ‌ర్‌లో ఉండే కొవ్వు క్ర‌మంగా తగ్గిపోతుంది. మీరు తినే ఆహారంలో ఉండే పోష‌కాల‌ను శ‌రీరం స‌రిగ్గా శోషించుకుంటుంది. ఇలా చ‌క్కెర తిన‌డం మానేసిన 30 రోజుల‌కు మీ శరీరంలో అద్భుత‌మైన మార్పులు చోటు చేసుకోవ‌డాన్ని గ‌మ‌నించ‌వ‌చ్చ‌ని పోష‌కాహార నిపుణులు చెబుతున్నారు.
