Vitamin B6 | విటమిన్ బీ6.. శరీరానికి ఎందుకు అవసరమంటే..?

Vitamin B6 | విటమిన్‌ బీ6ను మన శరీరం స్వతహాగా తయారు చేసుకోలేదు. అందుకని, మనం నిత్యం తీసుకునే ఆహార పదార్థాల ద్వారానే దీన్ని పొందాల్సి ఉంటుంది. లేదంటే సప్లిమెంట్ల రూపంలో కూడా...

Vitamin B6 | మన శరీరానికి అవసరమైన అనేక ముఖ్యమైన పోషకాల్లో విటమిన్ బి6 కూడా ఒకటి. దీన్నే పైరిడాక్సిన్ అని కూడా పిలుస్తారు. బీ6 మూడు రూపాల్లో.. పైరిడాక్సిల్‌, ఫైరిడాక్సిమైన్‌, ఫైరిడాక్సిన్‌గా ఉండి.. అవసరాన్ని బట్టి శరీరంలో రూపాలను మార్చుకుంటుంది. ఇది నీటిలో కరిగే విటమిన్. మన శరీరంలో అనేక పనులకు ఈ విటమిన్ ఎంతగానో ఉపయోగపడుతుంది. ముఖ్యంగా ప్రోటీన్లు, ఫ్యాట్స్, కార్బొహైడ్రేట్ల మెటబాలిజంకు, ఎర్ర రక్త కణాల ఉత్పత్తికి విటమిన్ బీ6 ఎంతో అవసరం.

అయితే ఈ విటమిన్‌ను మన శరీరం స్వతహాగా తయారు చేసుకోలేదు. అందుకని, మనం నిత్యం తీసుకునే ఆహార పదార్థాల ద్వారానే దీన్ని పొందాల్సి ఉంటుంది. లేదంటే సప్లిమెంట్ల రూపంలో కూడా విటమిన్‌ బీ6 ను శరీరానికి అందివ్వవచ్చు. ఈ విటమిన్‌ లోపిస్తే ఎలాంటి ఆరోగ్య సమస్యలు తలెత్తుతాయి.. వీటిని తీసుకోవడం వలన ఎలాంటి ఆరోగ్య ప్రయోజనాలు ఉన్నాయో తెలుసుకుందాం.

ఆరోగ్య సమస్యలివే..

• విటమిన్‌ బీ6 లోపం కారణంగా జీర్ణక్రియ మందగిస్తుంది.
• ఈ విటమిన్‌ లోపంతో అనీమియా రావడంతోపాటు పుట్టబోయే పిల్లల్లో లోపాలు తలెత్తుతాయి.
• రక్తహీనత కారణంగా అనేక సమస్యలు వస్తాయి.
• దృష్టి సమస్యలు కనిపిస్తాయి.
• చర్మంపై దద్దుర్లు వస్తాయి.
• పెదవులు పగులుతాయి.
• నాలుక, నోటి పూత వస్తుంది.
• డిప్రెషన్‌తో ఉంటారు.
• రోగ నిరోధక వ్యవస్థ పనితీరు మందగిస్తుంది.
• నిస్సత్తువగా, అలసిపోయినట్లుగా ఫీలవుతారు.
• చేతులు, పాదాల్లో గుండు పిన్నులతో గుచ్చినట్లు అనిపిస్తుంది.
• కొందరిలో ఫిట్స్ కూడా కనిపిస్తాయి.

లభించే ఆహారాలివే..

• విటమిన్ బీ6 ఎక్కువగా క్యారెట్‌, చేపలు, పిస్తాపప్పు, అవకాడోలు, చికెన్, మటన్ లివర్ తదితర ఆహారాల్లో లభిస్తుంది.
• అదేవిధంగా తోటకూర, పాలకూర, బచ్చలికూర, పుదీనా వంటి ఆకుకూరల్లో పుష్కలంగా దొరుకుతుంది.
• ఇంకా పప్పుదినుసులు, అరటిపండ్లలో ఉంటుంది.
• పచ్చి శనగల మొలకలు, ఎండు మిరపలో కూడా లభిస్తుంది.
• వీటిని తరచూ ఆహారంలో భాగం చేసుకోవడం ద్వారా విటమిన్ బి6 లోపం రాకుండా చూసుకోవచ్చు.
• అలాగే గుండె జబ్బులు, క్యాన్సర్, కంటి వ్యాధులు రాకుండా ఉంటాయి.

ఆరోగ్య ప్రయోజనాలివే..

• శరీరంలో కొత్త కణాలు ఏర్పడేందుకు ఫోలిక్‌ యాసిడ్‌ వెనకడుగు వేస్తుంది.
• నాడీ వ్యవస్థ సక్రమంగా పనిచేసేలా చేస్తుంది.
• జీవక్రియలను వేగవంతం చేస్తుంది.
• గుండె జబ్బులు, క్యాన్సర్, కంటి సంబంధ సమస్యలు రాకుండా చేస్తుంది.

గమనిక: ఈ కథనం కేవలం మీ అవగాహన కోసమే అందిస్తున్నాం. ఆరోగ్యానికి సంబంధించి ఏ సమస్యకైనా వైద్యులను సంప్రదించడం శ్రేయస్కరం.