Visit:
Brain Cancer | వ్యాధుల చికిత్సలో కొత్త మార్గాలను అన్వేషిస్తున్న శాస్త్రవేత్తలు తాజాగా విటమిన్ బి3 (నియాసిన్)పై ఆశాజనక పరిశోధనలు చేస్తున్నారు. ముఖ్యంగా మెదడు క్యాన్సర్లో అత్యంత ప్రమాదకరమైన గ్లియోబ్లాస్టోమా చికిత్సలో ఇది రోగనిరోధక వ్యవస్థ పనితీరును మెరుగుపరుస్తుందని ప్రారంభ అధ్యయనాలు సూచిస్తున్నాయి. అయితే ఇది ఇంకా ప్రయోగాత్మక దశలోనే ఉందని, వైద్యుల పర్యవేక్షణ లేకుండా అధిక మోతాదులో విటమిన్ బి3 సప్లిమెంట్లు తీసుకోవద్దని పరిశోధకులు హెచ్చరిస్తున్నారు. గ్లియోబ్లాస్టోమా మెదడులోని నాడీకణాలకు మద్దతు ఇచ్చే గ్లియల్ కణాల నుంచి ప్రారంభమయ్యే అత్యంత వేగంగా వ్యాపించే క్యాన్సర్. పెద్దల్లో కనిపించే అత్యంత సాధారణ ప్రాణాంతక మెదడు కణితుల్లో ఇది ఒకటి. ప్రస్తుతం దీనికి పూర్తిస్థాయి చికిత్స అందుబాటులో లేకపోయినా, శస్త్రచికిత్స, రేడియేషన్, కీమోథెరపీ ద్వారా కణితి పెరుగుదలను నియంత్రించడానికి, లక్షణాలను తగ్గించడానికి ప్రయత్నిస్తారు.
ఈ నేపథ్యంలో విటమిన్ బి3ని సాధారణ చికిత్సలతో కలిపి ఇస్తే ఫలితాలు మెరుగుపడతాయా అనే అంశంపై పరిశోధనలు కొనసాగుతున్నాయి. ప్రారంభ ఫలితాల ప్రకారం, అధిక మోతాదులో నియాసిన్ ఇవ్వడం వల్ల శరీరంలోని రోగనిరోధక కణాలు మళ్లీ చురుకుగా మారి క్యాన్సర్ కణాలను గుర్తించి వాటిపై దాడి చేసే సామర్థ్యాన్ని పెంచినట్లు గుర్తించారు. సాధారణంగా గ్లియోబ్లాస్టోమా కణితి రోగనిరోధక వ్యవస్థను బలహీనపరుస్తుంది. దీంతో శరీరంలోని రక్షణ కణాలు క్యాన్సర్ కణాలను సమర్థంగా ఎదుర్కోలేవు. అయితే నియాసిన్ ప్రభావంతో ఈ రోగనిరోధక కణాలు తిరిగి చురుకుగా మారి క్యాన్సర్ కణాలను నాశనం చేసే పనిని ప్రారంభించినట్లు పరిశోధనలో వెల్లడైంది. విటమిన్ బి3 లేదా నియాసిన్ మాంసం, చేపలు, పల్లీలు, ఇతర గింజలు, సంపూర్ణ ధాన్యాల్లో సహజంగా లభించే ముఖ్యమైన పోషక పదార్థం. ఇది ఆహారాన్ని శక్తిగా మార్చడంలో, కణాల ఆరోగ్యాన్ని కాపాడడంలో కీలక పాత్ర పోషిస్తుంది.
ప్రస్తుతం కొనసాగుతున్న ఫేజ్-1, ఫేజ్-2 క్లినికల్ ట్రయల్లో శస్త్రచికిత్స, కీమోథెరపీ, రేడియోథెరపీతోపాటు నియంత్రిత విడుదల (కంట్రోల్డ్-రిలీజ్) నియాసిన్ను సురక్షితంగా ఉపయోగించవచ్చా అనే అంశాన్ని పరిశీలిస్తున్నారు. ఇప్పటివరకు చికిత్స పొందిన తొలి 24 మంది రోగుల్లో 82 శాతం మందికి ఆరు నెలల తర్వాత కూడా వ్యాధి మరింతగా పెరిగిన ఆనవాళ్లు కనిపించలేదు. గత అధ్యయనాలతో పోలిస్తే ఇది మెరుగైన ఫలితంగా పరిశోధకులు భావిస్తున్నారు. ఈ ట్రయల్లో ఆరు నెలల వ్యవధిలో కనీసం 20 శాతం మెరుగుదల కనిపించకపోతే అధ్యయనాన్ని నిలిపివేయాలని ముందుగానే నిర్ణయించారు. అయితే ప్రారంభ ఫలితాలు అంచనాలకు మించి ఉండటంతో, సంప్రదాయ చికిత్సలతోపాటు నియాసిన్ ఇవ్వడం వల్ల అదనపు ప్రయోజనం కలుగుతుందనే ఆశాభావం వ్యక్తమవుతోంది.
అయితే ఈ ఫలితాలను ఇప్పుడే తుది నిర్ణయంగా భావించరాదని పరిశోధకులు స్పష్టం చేస్తున్నారు. ఇప్పటివరకు చాలా తక్కువ మంది రోగులపైనే అధ్యయనం జరిగింది. మొత్తం 48 మంది రోగులతో ట్రయల్ పూర్తి చేసిన తర్వాతే స్పష్టమైన నిర్ధారణకు వచ్చే అవకాశం ఉంది. అలాగే ఈ ఫలితాలను మరింత పెద్ద స్థాయి అధ్యయనాల ద్వారా కూడా నిర్ధారించాల్సి ఉంది. అధిక మోతాదులో విటమిన్ బి3 తీసుకోవడం పూర్తిగా సురక్షితం కాదని నిపుణులు హెచ్చరిస్తున్నారు. ఎక్కువ మోతాదులో నియాసిన్ వల్ల కాలేయానికి నష్టం, జీర్ణ సంబంధిత సమస్యలు, ఇతర దుష్ప్రభావాలు వచ్చే అవకాశం ఉంటుంది. అందువల్ల వైద్యుల సలహా లేకుండా అధిక మోతాదులో విటమిన్ బి3 సప్లిమెంట్లు తీసుకోవడం ప్రమాదకరమని సూచిస్తున్నారు. ప్రస్తుతం ఈ పరిశోధనలు ఆశాజనకంగా ఉన్నప్పటికీ, గ్లియోబ్లాస్టోమా చికిత్సలో దీనిని సాధారణ వైద్య విధానంగా పరిగణించడానికి మరింత శాస్త్రీయ ఆధారాలు అవసరమని నిపుణులు పేర్కొంటున్నారు.
