Visit:
Turmeric | కీళ్ల నొప్పులు, కండరాల నొప్పులు, క్రీడల సమయంలో కలిగే గాయాల వల్ల వచ్చే ఇబ్బందులను తగ్గించేందుకు చాలాకాలంగా పసుపును సహజ ఔషధంగా ఉపయోగిస్తున్నారు. భారతీయ వంటగదిలో సాధారణంగా కనిపించే ఈ మసాలాకు యాంటీ ఇన్ఫ్లమేటరీ, ఔషధ గుణాలు ఉన్నాయని పలు పరిశోధనలు సూచించాయి. తాజాగా వచ్చిన ఓ అధ్యయనం ప్రకారం.. క్రీడల వల్ల కలిగే కొన్ని గాయాల నొప్పిని తగ్గించడంలో పసుపులోని క్రియాశీల పదార్థం కర్కుమిన్ ఉపయోగకరంగా ఉంటుందని వెల్లడైంది. యురోపియన్ రివ్యూ ఫర్ మెడికల్ అండ్ ఫార్మకాలాజికల్ సైన్సెస్ జర్నల్లో ప్రచురితమైన ఈ అధ్యయనంలో, పసుపులో ఉండే కర్కుమిన్ గాయాల వల్ల కలిగే అసౌకర్యాన్ని తగ్గించడంలో కీలక పాత్ర పోషిస్తుందని పరిశోధకులు గుర్తించారు. దాదాపు మూడు వారాల కంటే తక్కువ వ్యవధిలోనే కర్కుమిన్ తీసుకున్న రగ్బీ క్రీడాకారుల్లో నొప్పి, అసౌకర్యం తగ్గినట్లు అధ్యయనం పేర్కొంది. ఈ ప్రభావం పారాసిటమాల్, ఐబుప్రోఫెన్ వంటి సాధారణ నొప్పి నివారణ మందులతో పోల్చదగినదిగా ఉన్నట్లు వెల్లడించింది.
ఈ పరిశోధన కోసం ఇటలీలోని మిలాన్ నగరానికి దక్షిణంగా ఉన్న పియాచెంజా క్లబ్కు చెందిన 50 మంది రగ్బీ క్రీడాకారులను పరిశీలించారు. వీరంతా ఎముకలు లేదా కండరాలకు సంబంధించిన సమస్యలతో బాధపడుతున్నవారు. పరిశోధకులు వారిని రెండు గ్రూపులుగా విభజించారు. ఒక గ్రూపులోని క్రీడాకారులకు రోజుకు రెండుసార్లు ఒక గ్రాము కర్కుమిన్ ఎక్స్ట్రాక్ట్ టాబ్లెట్లను గరిష్ఠంగా 10 రోజుల పాటు ఇచ్చారు. మరో గ్రూపులోని వారికి నొప్పి నివారణ మందులను అందించారు. ఈ రెండు గ్రూపులను పరిశీలించిన తర్వాత, కర్కుమిన్ తీసుకున్నవారిలో గాయాల వల్ల కలిగే నొప్పి, అసౌకర్యం తగ్గినట్లు పరిశోధకులు గుర్తించారు. పసుపుకు పసుపు రంగును అందించే కర్కుమిన్ దాని యాంటీ ఇన్ఫ్లమేటరీ లక్షణాలకు ప్రధాన కారణంగా భావిస్తారు. శరీరంలో వాపును తగ్గించడంలో ఇది సహాయపడే అవకాశం ఉంటుందని పరిశోధనలు సూచిస్తున్నాయి. అందువల్ల తీవ్రమైన శారీరక శ్రమతో సంబంధం ఉన్న ఎముకలు, కండరాల సమస్యల్లో కర్కుమిన్ ఆధారిత సహజ ఉత్పత్తులు నొప్పిని తగ్గించేందుకు ఉపయోగపడే అవకాశం ఉందని పరిశోధకులు పేర్కొన్నారు.
కర్కుమిన్ను కీళ్ల వాపు, ఆర్థరైటిస్, గుండె సంబంధిత సమస్యలు, ఇతర ఆరోగ్య పరిస్థితుల్లో సహజ పరిష్కారంగా ఉపయోగించవచ్చనే ఆసక్తి చాలాకాలంగా ఉంది. అయితే ఈ అధ్యయనంలో ప్రధానంగా క్రీడాకారుల్లో ఎముకలు, కండరాలకు సంబంధించిన సమస్యలు, వాటి వల్ల కలిగే నొప్పిపైనే దృష్టి పెట్టారు. కర్కుమిన్ తీసుకున్నవారు సూచించిన చికిత్సను కొనసాగించే అవకాశం కూడా ఎక్కువగా ఉన్నట్లు ఈ అధ్యయనం వెల్లడించింది. అయితే పసుపు లేదా కర్కుమిన్ను సాధారణ నొప్పి నివారణ మందులకు ప్రత్యామ్నాయంగా స్వయంగా ఉపయోగించడం కంటే, వైద్యుల సలహాతో తీసుకోవడం మంచిది. గతంలో జరిగిన కొన్ని పరిశోధనలు పసుపులోని కర్కుమిన్ జ్ఞాపకశక్తి, డిప్రెషన్ వంటి అంశాలపై కూడా ప్రభావం చూపిస్తుందని సూచించాయి. అయితే ఈ పరిశోధన ప్రధానంగా క్రీడా గాయాలు, ఎముకలు, కండరాల నొప్పి, వాపు తగ్గింపుపైనే దృష్టి పెట్టింది.
పసుపు వినియోగానికి భారత్, చైనాలో వేల సంవత్సరాల చరిత్ర ఉంది. ఆయుర్వేదంలో కూడా పసుపుకు ఎంతోకాలంగా ప్రాధాన్యం ఉంది. జీర్ణక్రియకు సహాయపడటం, ఉబ్బరం, గ్యాస్ వంటి సమస్యలను తగ్గించడం వంటి ప్రయోజనాలు పసుపుతో ముడిపడి ఉన్నాయి. అలాగే పసుపులోని కొన్ని పదార్థాలకు యాంటీ బ్యాక్టీరియల్, యాంటీ వైరల్, యాంటీ ఫంగల్ లక్షణాలు ఉన్నట్లు కూడా నిపుణులు చెబుతున్నారు. ఇవి రోగనిరోధక వ్యవస్థకు మద్దతు ఇవ్వడంలో కీలక పాత్ర పోషిస్తాయి. పసుపులోని కర్కుమిన్ క్రీడల సమయంలో కలిగే కొన్ని ఎముకలు, కండరాల సమస్యల వల్ల వచ్చే నొప్పి, వాపులను తగ్గించడంలో ఉపయోగపడే అవకాశం ఉంది. అయితే పసుపు అన్ని రకాల గాయాలకు లేదా నొప్పులకు నొప్పి నివారణ మందుల కంటే మెరుగైనదని నిర్ధారించడానికి మరింత విస్తృతమైన పరిశోధనలు అవసరమని నిపుణులు చెబుతున్నారు.
