Mens Health | పురుషుల్లో అధిక ఒత్తిడి కార‌ణంగా ఏర్ప‌డే అనారోగ్య స‌మ‌స్య‌లు ఇవే.. ఏం చేయాలంటే..?

పురుషుల్లో సంతానలేమి సమస్య గురించి ఇప్పటికీ చాలా తక్కువగా చర్చ జరుగుతోంది. అయితే జీవనశైలిలో వచ్చిన మార్పులు, ఒత్తిడి, నిద్రలేమి, శారీరక శ్రమ లేకపోవడం వంటి అంశాలు పురుషుల సంతానోత్పత్తి సామర్థ్యంపై గణనీయమైన ప్రభావం చూపుతున్నాయని నిపుణులు చెబుతున్నారు.

Mens Health | పురుషుల్లో సంతానలేమి సమస్య గురించి ఇప్పటికీ చాలా తక్కువగా చర్చ జరుగుతోంది. అయితే జీవనశైలిలో వచ్చిన మార్పులు, ఒత్తిడి, నిద్రలేమి, శారీరక శ్రమ లేకపోవడం వంటి అంశాలు పురుషుల సంతానోత్పత్తి సామర్థ్యంపై గణనీయమైన ప్రభావం చూపుతున్నాయని నిపుణులు చెబుతున్నారు. ఒక్క కారణం వల్లే ఈ సమస్య రాదని, శరీర పరిస్థితులు, పర్యావరణం, రోజువారీ అలవాట్లు కలిసి దీనిపై ప్రభావం చూపుతాయని అంటున్నారు. సంతానోత్పత్తి గురించి మాట్లాడేటప్పుడు సాధారణంగా ఆహారం, వయస్సు లేదా ఇతర ఆరోగ్య సమస్యలపైనే ఎక్కువ దృష్టి పెడతారు. కానీ దీర్ఘకాలిక మానసిక ఒత్తిడి, సరిపడా నిద్ర లేకపోవడం, గంటల తరబడి ఒకేచోట కూర్చునే అలవాటు కూడా వీర్యకణాల నాణ్యత, హార్మోన్ల సమతుల్యత, సంతానోత్పత్తి సామర్థ్యంపై ప్రతికూల ప్రభావం చూపుతాయని అధ్యయనాలు చెబుతున్నాయి.

సంతాన లోపం స‌మ‌స్య‌లు..

నేటి ఉద్యోగ జీవనశైలిలో ఒత్తిడి దాదాపు రోజువారీ జీవితంలో భాగంగా మారిపోయింది. అప్పుడప్పుడు వచ్చే ఒత్తిడి పెద్దగా సమస్య కాకపోయినా, ఎక్కువకాలం కొనసాగే మానసిక ఒత్తిడి వీర్యకణాల సంఖ్య తగ్గడం, వాటి కదలిక మందగించడం, ఆకృతిలో మార్పులు రావడం వంటి సమస్యలకు దారితీస్తుంద‌ని నిపుణులు చెబుతున్నారు. ఈ సమయంలో కార్టిసాల్ అనే ఒత్తిడి హార్మోన్ పెరగడం వల్ల వీర్యకణాల ఉత్పత్తి, టెస్టోస్టెరాన్ స్థాయిలను నియంత్రించే హార్మోన్ల పనితీరు దెబ్బతినే అవకాశం ఉంటుంది. అంతేకాకుండా ఒత్తిడి పెరిగే కొద్దీ నిద్ర, ఆహారపు అలవాట్లు కూడా దెబ్బతిని సమస్య మరింత తీవ్రమయ్యే ప్రమాదం ఉంటుంది. నిద్ర కేవలం శరీరానికి విశ్రాంతి ఇచ్చే సమయం మాత్రమే కాదు. ఈ సమయంలోనే శరీరంలో అనేక హార్మోన్ల నియంత్రణ ప్రక్రియలు జరుగుతాయి. నిరంతరం నిద్రలేమితో బాధపడేవారిలో వీర్యకణాల నాణ్యత తగ్గడం, వాటి చురుకుదనం తగ్గిపోవడం, సంతానోత్పత్తి సామర్థ్యం బలహీనపడటం వంటి సమస్యలు కనిపించే అవకాశం ఉంటుందని నిపుణులు చెబుతున్నారు. ప్రతి రాత్రి 7 నుంచి 8 గంటల నాణ్యమైన నిద్ర అవసరమని, అయితే అవసరానికి మించి ఎక్కువసేపు నిద్రపోవడం కూడా కొన్ని పరిశోధనల్లో ప్రతికూల ప్రభావాలతో సంబంధం ఉన్నట్లు గుర్తించారని పేర్కొంటున్నారు.

ఏం చేయాలి..

ప్రస్తుతం చాలా మంది ఉద్యోగరీత్యా గంటల తరబడి కంప్యూటర్ ముందు లేదా వాహనం నడుపుతూ కూర్చోవాల్సి వస్తోంది. అయితే ఎక్కువసేపు ఒకేచోట కూర్చోవడం వల్ల శరీరంలో వాపు సంబంధిత మార్పులు, జీవక్రియలో లోపాలు ఏర్పడి అవి పరోక్షంగా వీర్యకణాల నాణ్యతపై ప్రభావం చూపే అవకాశం ఉంటుంది. దీనికి భిన్నంగా ప్రతిరోజూ మితమైన శారీరక వ్యాయామం చేసే వారిలో వీర్యకణాల నాణ్యత, సంతానోత్పత్తి ఆరోగ్యం మెరుగ్గా ఉండే అవకాశాలు ఎక్కువగా ఉన్నాయని నిపుణులు చెబుతున్నారు. పురుషుల్లో సంతానలేమి సమస్యకు ఒక్కటే కారణం ఉండదు. జీవశాస్త్ర సంబంధిత అంశాలు, పర్యావరణ పరిస్థితులు, రోజువారీ జీవనశైలి అన్నీ కలిసి దీనిపై ప్రభావం చూపుతాయి. మానసిక ఒత్తిడిని తగ్గించుకోవడం, సరిపడా నిద్రపోవడం, ఆరోగ్యకరమైన బరువును కొనసాగించడం, ప్రతిరోజూ శారీరకంగా చురుకుగా ఉండడం వంటి అలవాట్లు శరీరం తిరిగి సాధారణ స్థితికి చేరుకోవడానికి సహాయపడతాయి. అయినప్పటికీ సమస్య కొనసాగితే ఆలస్యం చేయకుండా వైద్యులను సంప్రదించి పరీక్షలు చేయించుకోవడం ద్వారా అసలు కారణాన్ని ముందుగానే గుర్తించి సరైన చికిత్స పొందే అవకాశం పెరుగుతుందని నిపుణులు తెలియ‌జేస్తున్నారు.