GLP-1 Medicine | జీఎల్‌పీ-1 మందుల‌ను వాడ‌డం ఆపేశారా.. అయితే ఇంకా ఎక్కువ బ‌రువు పెరుగుతార‌ట‌..

అధిక శ‌రీర బ‌రువు కార‌ణంగా అనేక అనారోగ్య స‌మ‌స్య‌లు త‌లెత్తుతాయ‌న్న సంగ‌తి అంద‌రికీ తెలిసిందే. దీంతో చాలా మంది శ‌రీర బ‌రువును తగ్గించుకోవ‌డానికి అనేక ర‌కాల ప్ర‌య‌త్నాలు చేస్తున్నారు. వాటిలో బ‌రువు త‌గ్గే ఇంజెక్ష‌న్ ల‌ను వాడ‌డం కూడా ఒక‌టి. ఇవి బ‌రువు త‌గ్గ‌డంలో చాలా స‌హాయ‌ప‌డ‌తాయి.

GLP-1 Medicine | అధిక శ‌రీర బ‌రువు కార‌ణంగా అనేక అనారోగ్య స‌మ‌స్య‌లు త‌లెత్తుతాయ‌న్న సంగ‌తి అంద‌రికీ తెలిసిందే. దీంతో చాలా మంది శ‌రీర బ‌రువును తగ్గించుకోవ‌డానికి అనేక ర‌కాల ప్ర‌య‌త్నాలు చేస్తున్నారు. వాటిలో బ‌రువు త‌గ్గే ఇంజెక్ష‌న్ ల‌ను వాడ‌డం కూడా ఒక‌టి. ఇవి బ‌రువు త‌గ్గ‌డంలో చాలా స‌హాయ‌ప‌డ‌తాయి. సెమాగ్లుటైడ్, టిర్జెప‌టైడ్ వంటి మందులు ఆక‌లిని త‌గ్గిస్తాయి. పొట్ట‌ ఖాళీ అవ్వ‌డాన్ని త‌గ్గిస్తాయి. జీవ‌క్రియ నియంత్ర‌ణ‌ను మెరుగుప‌రుస్తాయి. దీంతో సుల‌భంగా బ‌రువు త‌గ్గ‌వ‌చ్చు. అయితే ఈ మందుల‌ వాడ‌కం ఆగిన త‌రువాత ప్ర‌యోజ‌నాలు త్వ‌ర‌గా త‌గ్గుతాయ‌ని కొత్త ప‌రిశోధ‌న‌లు తెలియ‌జేస్తున్నాయి.

మొద‌టి సంవ‌త్స‌రంలో మ‌ళ్లీ బ‌రువు పెరుగుద‌ల‌..

ఈ మందులు వాడ‌డం ఆపిన త‌రువాత చాలా మంది త్వ‌ర‌గా బ‌రువు తిరిగి పొందుతార‌ని ప‌రిశోధన‌లు తెలియ‌జేస్తున్నాయి. చికిత్స ఆపేసిన త‌రువాత మొద‌టి సంవ‌త్స‌రంలోనే కోల్పోయిన బ‌రువులో ఎక్కువ భాగాన్ని తిరిగి పొందుతార‌ని, ఊబ‌కాయం ఒక దీర్ఘ‌కాలిక వ్యాధిలా ప్ర‌వ‌ర్తిస్తుంద‌ని నిపుణులు చెబుతున్నారు. చికిత్స ఆపిన త‌రువాత వ్య‌క్తులు నెల‌కు దాదాపు 0.4 కిలోల బ‌రువు తిరిగి పొందుతున్నార‌ని 9వేల మందికి పైగా జ‌రిపిన ప‌రిశోధ‌న‌ల్ల‌లో వెల్ల‌డైంది. చాలా మంది 1.7 సంవ‌త్స‌రాల‌లోపే వారి కోల్పోయిన బ‌రువును తిరిగి పొందుతున్నారని వైద్యులు చెబుతున్నారు.

బీపీ, షుగ‌ర్‌, కొలెస్ట్రాల్ అటాక్‌..

బ‌రువు త‌గ్గే ఇంజెక్ష‌న్ ల‌ను వాడ‌డం ఆపిన త‌రువాత శ‌రీరం స‌హ‌జ ఆక‌లి సంకేతాలు, జీవ‌క్రియ వేగం తిరిగి మామూలు స్థితికి చేరుకుంటాయి. దీంతో క్ర‌మంగా బ‌రువు తిరిగి పెరుగుతారు. బ‌రువు తిరిగి పెరిగే స‌రికి చాలా మందిలో ర‌క్త‌పోటు, చ‌క్కెర స్థాయిలు, కొలెస్ట్రాల్ వంటి జీవ‌క్రియ మెరుగుద‌ల‌లు త‌గ్గ‌డం ప్రారంభించాయ‌ని కూడా వైద్యులు ప‌రిశోధ‌న‌ల ద్వారా తెలియ‌జేస్తున్నారు. అంతేకాకుండా ఆహారాల ద్వారా చేసే డైటింగ్ త‌రువాత పెరిగే బ‌రువు కంటే మందులు ఆపేసిన త‌రువాత వేగంగా బ‌రువు పెరుగుతున్నార‌ని విశ్లేష‌ణ సూచించింది. జీఎల్‌పీ – 1 వంటి మందులు మెద‌డులో ఆక‌లి సంకేతాలను మారుస్తాయి. ఎక్కువ స‌మ‌యం క‌డుపు నిండిన భావన‌ క‌లిగి ఉండ‌డానికి, త‌క్కువ ఆహారాన్ని తీసుకోవ‌డానికి ఇవి స‌హాయ‌ప‌డ‌తాయి. వీటిని తీసుకోవ‌డం మానేసిన త‌రువాత ఆక‌లి సంకేతాలు మామూలు స్థితికి వ‌స్తాయి. దీంతో ఆక‌లి పెర‌గ‌డంతో పాటు క్యాల‌రీలు తీసుకోవ‌డం పెరుగుతుంది.

ఆరోగ్య‌క‌ర‌మైన జీవ‌న‌శైలి అవ‌స‌రం..

బ‌రువు త‌గ్గ‌డానికి వాడే మందులు శ‌క్తివంతంగా ఉన్న‌ప్ప‌టికి, స్థిరమైన ఫ‌లితాలు, దీర్ఘ‌కాలిక ప్ర‌వ‌ర్తనా మార్పుల‌పై ఆధార‌ప‌డి ఉంటాయని నిపుణులు చెబుతున్నారు. ఆరోగ్య‌క‌ర‌మైన అల‌వాట్లు, క్ర‌మం త‌ప్ప‌కుండా శారీర‌క వ్యాయామం చేయ‌డం వ‌ల్ల మందులు ఆపేసిన త‌రువాత కూడా బ‌రువు త‌గ్గ‌డాన్ని ఎక్కువ కాలం పాటు నిలుపుకోవ‌చ్చ‌ని ప‌రిశోధ‌న‌లు తెలియ‌జేస్తున్నాయి. బ‌రువు త‌గ్గించే మందులు ఊబ‌కాయం చికిత్స‌లో విప్ల‌వాత్మ‌క మార్పుల‌ను తీసుకువ‌చ్చిన‌ప్ప‌టికీ చికిత్స నిలిపివేస్తే ప్ర‌యోజ‌నాలు కొన‌సాగ‌క‌పోవ‌చ్చ‌ని కోల్పోయిన బ‌రువును సంవ‌త్సరం లోపే తిరిగి పొందుతున్నార‌ని నిపుణులు చెబుతున్నారు. స్థిర‌మైన బ‌రువుకు వైద్య చికిత్స‌, ప్ర‌వ‌ర్త‌న మ‌ద్ద‌తు, దీర్ఘ‌కాలిక జీవ‌న‌శైలి మార్పుల క‌ల‌యిక అవ‌స‌ర‌మని వైద్యులు తెలియ‌జేస్తున్నారు.