Health Tips : ఆధునిక ఉరుకుల పరుగుల జీవితంలో దాదాపు ప్రతి ఒక్కరినీ నిస్సత్తువ, అలసట ఆవహిస్తుంది. అయితే ఉదయాన్నే పోషక విలువలతో కూడిన అల్పాహారంతో రోజంతా ఉత్సాహంగా, ఉత్తేజంగా ఉండవచ్చని డైటీషియన్లు చెబుతున్నారు. ప్రొటీన్, ఆరోగ్యకర కొవ్వులతో రోజును ప్రారంభించడం మేలని వారు సూచిస్తున్నారు. మనం తీసుకునే ఆహారంలో చిన్నపాటి మార్పులతో రోజంతా హుషారుగా గడుపుతూ అలసటను పారదోలవచ్చని చెబుతున్నారు.
వైట్ బ్రెడ్, పేస్ట్రీస్ వంటి రిఫైన్డ్ కార్బోహైడ్రేట్లను తీసుకోవడం నిలిపివేసి వాటి స్ధానంలో బ్రౌన్ రైస్, క్వినోవా వంటి కాంప్లెక్స్ కార్బ్స్తో పాటు బీన్స్, పప్పు ధాన్యాలు, స్వీట్ పొటాటోస్, కార్న్ వంటి పిండిపదార్ధాలతో కూడిన కూరగాయలు అధికంగా తీసుకోవాలని ప్రముఖ క్లినికల్ న్యూట్రిషనిస్ట్ డాక్టర్ సంగీతా తివారీ చెబుతున్నారు. ఇవి శక్తిని మెల్లిగా విడుదల చేస్తూ, ఎక్కువ సేపు అలసటకు గురికాకుండా చూస్తాయని చెప్పారు. ఇక శరీరంలో కణాలు, ఎంజైమ్స్ను బలోపేతం చేసేందుకు ప్రొటీన్ను అధికంగా తీసుకోవాలి. ఇది బ్లడ్ షుగర్ను నియంత్రించగంతో పాటు శక్తి హీనం కాకుండా నిలువరిస్తాయని ఆమె వివరించారు.
చికెన్, ఫిష్, తోఫు, నట్స్ వంటి లీన్ ప్రొటీన్ను ఆహారంలో భాగం చేసుకోవాలని సూచిస్తున్నారు. చక్కెర అధికంగా ఉండే పానీయాలు, ప్రాసెస్డ్ ఫుడ్ బ్లడ్ షుగర్ లెవెల్స్ను పెంచి అలసటకు గురిచేస్తాయని వీటి స్ధానంలో పండ్ల నుంచి అందే సహజ చక్కెరలను మితంగా తీసుకోవచ్చని డాక్టర్ తివారీ పేర్కొన్నారు. కొలెస్ట్రాల్ లెవెల్స్ను పెంచే నూనె పదార్ధాలను కూడా తగ్గించాలని మణిపాల్ హాస్పిటల్ చీఫ్ డైటీషియన్ ఇంద్రాణి ఘోష్ చెబుతున్నారు. అవకాడో, ఆలివ్ ఆయిల్, నట్స్, ఫ్యాటీ ఫిష్ వంటి ఆరోగ్యకర కొవ్వులను తీసుకోవచ్చని ఇవి శక్తిని ఉత్పత్తి చేయడంతో పాటు హార్మోన్ల నియంత్రణకు ఉపకరిస్తాయని చెప్పారు. వీటితో పాటు తాజా పండ్లు, కూరగాయలను అధికంగా తీసుకోవాలి.
Read More :