Visit:
Bacteria | మాంసాన్ని తినేసే బ్యాక్టీరియాగా పిలిచే కొన్ని రకాల సూక్ష్మజీవులు వేడెక్కుతున్న సముద్ర జలాల్లో వేగంగా విస్తరిస్తుండటంతో ప్రజల్లో ఆందోళన పెరుగుతోంది. ముఖ్యంగా విబ్రియో వల్నిఫికస్ (Vibrio vulnificus) అనే బ్యాక్టీరియా గాయాల ద్వారా శరీరంలోకి ప్రవేశించి తీవ్రమైన ఇన్ఫెక్షన్కు కారణమవుతుంది. అరుదుగా సంభవించినప్పటికీ, ఈ ఇన్ఫెక్షన్ వేగంగా ప్రాణాంతకంగా మారే అవకాశం ఉండటంతో సముద్రంలో ఈత కొట్టేవారు, మత్స్యకారులు, పచ్చి సముద్ర ఆహారం తినేవారు అప్రమత్తంగా ఉండాలని నిపుణులు సూచిస్తున్నారు. మాంసాన్ని తినే బ్యాక్టీరియా అనే పదం వాస్తవానికి చర్మాన్ని తినేయడం అనే అర్థంలో కాదు. కొన్ని బ్యాక్టీరియాలు నెక్రోటైజింగ్ ఫాసియైటిస్ అనే అరుదైన తీవ్రమైన ఇన్ఫెక్షన్కు కారణమవుతాయి. ఇవి శరీరంలోకి ప్రవేశించిన తర్వాత విషపదార్థాలను విడుదల చేసి చర్మం కింద ఉండే కణజాలంతోపాటు కండరాలు, నరాలు, రక్తనాళాలను దెబ్బతీస్తాయి. బ్యాక్టీరియా రక్తప్రవాహంలోకి చేరితే ఇతర అవయవాలకు కూడా వేగంగా వ్యాపిస్తుంది. చికిత్స అందకపోతే కొన్నిసార్లు 48 గంటల్లోనే ప్రాణాంతకంగా మారే ప్రమాదం ఉంటుంది.
నెక్రోటైజింగ్ ఫాసియైటిస్కు సాధారణంగా గ్రూప్ ఎ స్ట్రెప్టోకోకస్ బ్యాక్టీరియా ప్రధాన కారణంగా ఉంటుంది. అయితే విబ్రియో వల్నిఫికస్ కూడా ఈ తీవ్రమైన ఇన్ఫెక్షన్కు కారణమయ్యే బ్యాక్టీరియాల్లో ఒకటిగా ఉంది. అమెరికాలో ప్రతి ఏడాది సుమారు 150 నుంచి 200 వరకు విబ్రియో వల్నిఫికస్ ఇన్ఫెక్షన్లు నమోదవుతున్నప్పటికీ, వీటిలో సుమారు ఐదుగురిలో ఒకరు ప్రాణాలు కోల్పోతున్నారు. యూరప్లోనూ ఈ ఇన్ఫెక్షన్ల సంఖ్య పెరుగుతున్నట్లు సమాచారం. విబ్రియో వల్నిఫికస్ ప్రధానంగా వేడిగా ఉండే సముద్రపు నీటిలో జీవిస్తుంది. సముద్రం, మంచినీరు కలిసే ఉప్పునీటి ప్రాంతాల్లోనూ ఇది కనిపిస్తుంది. సాధారణంగా వెచ్చని నెలల్లో ఇన్ఫెక్షన్లు ఎక్కువగా నమోదవుతాయి. సముద్రంలో ఈత కొట్టడం, చేపలు పట్టడం లేదా నీటిలోకి దిగిన సమయంలో శరీరంపై ఉన్న చిన్న గాయం, కోత లేదా పుండ్ల ద్వారా బ్యాక్టీరియా శరీరంలోకి ప్రవేశిస్తుంది. సముద్రపు నీటిలో పట్టిన షెల్ఫిష్, ముఖ్యంగా ఆయిస్టర్లు వంటి సముద్ర ఆహారంలోనూ ఈ బ్యాక్టీరియా ఉండే అవకాశం ఉంటుంది. వాటిని పచ్చిగా లేదా సరిగ్గా ఉడికించకుండా తినడం వల్ల ఆహార సంబంధిత ఇన్ఫెక్షన్ వచ్చే ప్రమాదం ఉంటుంది. అలాగే చేతిపై గాయం ఉన్నప్పుడు పచ్చి చేపలు లేదా సముద్ర ఆహారాన్ని శుభ్రం చేయడం, పట్టుకోవడం ద్వారా కూడా బ్యాక్టీరియా శరీరంలోకి ప్రవేశిస్తుంది.
వాతావరణ మార్పులు, సముద్రపు నీటి ఉష్ణోగ్రతలు పెరగడం కూడా ఈ బ్యాక్టీరియా వ్యాప్తికి అనుకూల పరిస్థితులను సృష్టిస్తున్నాయి. గతంలో కొన్ని ప్రాంతాలకు మాత్రమే పరిమితమైన విబ్రియో వల్నిఫికస్ ఇప్పుడు అమెరికా తూర్పు తీరంలోని మరిన్ని ఉత్తర ప్రాంతాల్లోనూ కనిపిస్తోంది. తూర్పు అమెరికాలో 1988 నుంచి 2018 మధ్య ఈ బ్యాక్టీరియాతో ఏర్పడే గాయాల ఇన్ఫెక్షన్లు ఎనిమిది రెట్లు పెరిగినట్లు ఒక అధ్యయనం వెల్లడించింది. వాతావరణ మార్పుల కారణంగా ఉత్తర యూరప్, బాల్టిక్ సముద్ర ప్రాంతాల్లోని తీర జలాలు కూడా వేడెక్కుతున్నాయి. దీంతో అక్కడ కూడా విబ్రియో బ్యాక్టీరియా వ్యాప్తికి అనుకూల పరిస్థితులు ఏర్పడుతున్నాయి. అంతేకాకుండా వాతావరణ మార్పుల వల్ల తుఫానులు, సముద్రపు అలల ఉద్ధృతి పెరగడం కూడా ఇన్ఫెక్షన్లకు కారణమవుతోంది. తుఫానుల సమయంలో ప్రజలు సముద్రపు నీరు లేదా ఉప్పునీటితో ఎక్కువగా సంబంధం కలిగి ఉండటం వల్ల బ్యాక్టీరియా గాయాల ద్వారా శరీరంలోకి ప్రవేశించే అవకాశం పెరుగుతుంది. ఈ ఇన్ఫెక్షన్ ఎవరికైనా వస్తుంది. అయితే వృద్ధులు, రోగనిరోధక శక్తి తక్కువగా ఉన్నవారిలో తీవ్రమైన ఇన్ఫెక్షన్ వచ్చే ప్రమాదం ఎక్కువగా ఉంటుంది. ముఖ్యంగా మధుమేహం, కాలేయ వ్యాధులు, క్యాన్సర్, హెచ్ఐవీ వంటి ఆరోగ్య సమస్యలు ఉన్నవారు లేదా రోగనిరోధక శక్తిని తగ్గించే మందులు తీసుకునేవారు మరింత జాగ్రత్తగా ఉండాలి.
గాయం సోకినప్పుడు ప్రారంభ దశలో జ్వరం, గాయం చుట్టూ ఎర్రబడటం, తీవ్రమైన నొప్పి లేదా వాపు వంటి లక్షణాలు కనిపిస్తాయి. ఇలాంటి లక్షణాలను నిర్లక్ష్యం చేయకూడదు. ఇన్ఫెక్షన్ వేగంగా ముదిరితే చర్మంపై పుండ్లు, దద్దుర్లు, రంగు మారడం, చీము వంటి లక్షణాలు కనిపిస్తాయి. పరిస్థితి తీవ్రంగా మారితే కణజాలాన్ని శస్త్రచికిత్స ద్వారా తొలగించాల్సి వస్తుంది. కొన్ని సందర్భాల్లో ఇన్ఫెక్షన్ వ్యాప్తిని అడ్డుకునేందుకు ప్రభావితమైన అవయవాన్ని తొలగించాల్సిన పరిస్థితి కూడా ఏర్పడుతుంది. ఈ ఇన్ఫెక్షన్లో చికిత్స ఆలస్యం చేయడం ప్రమాదకరం. వైద్యులు సాధారణంగా రక్తనాళాల ద్వారా యాంటీబయాటిక్స్ అందిస్తారు. అవసరమైతే ఇన్ఫెక్షన్ సోకిన కణజాలాన్ని శస్త్రచికిత్స ద్వారా తొలగిస్తారు. అయితే కొన్ని విబ్రియో వల్నిఫికస్ బ్యాక్టీరియాలు కొన్ని యాంటీ బయాటిక్స్కు నిరోధకతను అభివృద్ధి చేసుకోవడం చికిత్సను మరింత క్లిష్టతరం చేస్తోందని పరిశోధకులు ఆందోళన వ్యక్తం చేస్తున్నారు.
ఈ ప్రమాదాన్ని తగ్గించేందుకు కొన్ని జాగ్రత్తలు తప్పనిసరిగా పాటించాలి. శరీరంపై కొత్తగా అయిన కోత, గాయం, పియర్సింగ్ లేదా టాటూ ఉంటే విబ్రియో బ్యాక్టీరియా ఉండే అవకాశం ఉన్న నీటిలోకి వెళ్లకపోవడం మంచిది. తప్పనిసరిగా నీటిలోకి వెళ్లాల్సి వస్తే గాయాన్ని వాటర్ప్రూఫ్ బ్యాండేజ్తో పూర్తిగా కప్పాలి. చిన్నపాటి గీత లేదా గాయం కూడా బ్యాక్టీరియా శరీరంలోకి ప్రవేశించడానికి సరిపోతుంది. చేతులు లేదా శరీరంపై తెరిచి ఉన్న గాయాలు ఉన్నవారు పచ్చి చేపలు, షెల్ఫిష్ వంటి సముద్ర ఆహారాన్ని తాకకూడదు. చేపలు పట్టే సమయంలో, సముద్ర ఆహారాన్ని సిద్ధం చేసే సమయంలో లేదా ఈత కొడుతున్నప్పుడు గాయం ఏర్పడితే వెంటనే సబ్బు, నీటితో ఆ ప్రాంతాన్ని పూర్తిగా శుభ్రం చేయాలి. నెక్రోటైజింగ్ ఫాసియైటిస్ చాలా అరుదైన ఇన్ఫెక్షన్ అయినప్పటికీ, తీవ్రత ఎక్కువగా ఉండటంతో అప్రమత్తంగా ఉండటం అవసరం. ముఖ్యంగా సముద్రంలో ఈత కొట్టేవారు, చేపలు పట్టేవారు, పచ్చి లేదా సరిగ్గా ఉడికించని షెల్ఫిష్ తినేవారు గాయాలను నిర్లక్ష్యం చేయకుండా తగిన జాగ్రత్తలు తీసుకోవాలి. గాయం తర్వాత తీవ్రమైన నొప్పి, వాపు, ఎర్రబడటం లేదా జ్వరం వంటి లక్షణాలు కనిపిస్తే ఆలస్యం చేయకుండా వైద్య సహాయం తీసుకోవడం అత్యంత ముఖ్యం.
