Menstruation | నెలసరి రావాలంటే మందులు వాడాల్సి వస్తుంది.. ఈ సమస్యకు కారణం బరువు పెరగడమేనా?

Menstruation | నా వయసు 21 సంవత్సరాలు. ఎత్తు 5 అడుగుల 4 అంగుళాలు. బరువు 65 కేజీలు. మూడేళ్ల నుంచి పీసీఓడీ సమస్య ఉంది. లాక్‌డౌన్‌లో బరువు పెరిగాను. ఆ తర్వాతే ఈ ఇబ్బంది వచ్చింది.

Menstruation |  నా వయసు 21 సంవత్సరాలు. ఎత్తు 5 అడుగుల 4 అంగుళాలు. బరువు 65 కేజీలు. మూడేళ్ల నుంచి పీసీఓడీ సమస్య ఉంది. లాక్‌డౌన్‌లో బరువు పెరిగాను. ఆ తర్వాతే ఈ ఇబ్బంది వచ్చింది. ప్రస్తుతం నెలసరి రావాలంటే డాక్టర్‌ ఇచ్చిన మందులు వాడాల్సి వస్తున్నది. నేను బరువు పెరగడం వల్లే ఈ సమస్య వచ్చిందా. బరువు తగ్గితే తగ్గిపోతుందా?

– ఓ పాఠకురాలు

అవును, కచ్చితంగా బరువు పెరగడం వల్లే మీకు ఈ సమస్య వచ్చింది. అలాగే వేళకు తిండి, నిద్రలేని జీవనశైలి కూడా ఇందుకు కారణం కావచ్చు. బరువు పెరిగితే విసరల్‌ ఫ్యాట్‌ కూడా ఎక్కువ అవుతుంది. అంటే ఆడపిల్లల్లో పొట్టచుట్టూ చేరే కొవ్వు ఇది. దీనివల్ల శరీరంలోని ఇన్సులిన్‌ సరిగ్గా పనిచేయదు. దాంతో అండం సమయానికి విడుదల కాదు. వీటన్నిటి వల్లా నెలసరి సక్రమంగా రాదు. దాన్ని సరిచేసేందుకు హార్మోన్‌ మాత్రలు వాడాల్సి వస్తున్నది.

కాబట్టి ముందు మీరు బరువు తగ్గండి. సరైన ఆహారాన్ని తీసుకుని, వ్యాయామాన్ని రోజువారీ కార్యక్రమాల్లో భాగం చేసుకోండి. పచ్చళ్లు, స్వీట్లు, చక్కెర, వేపుళ్ల లాంటివి దూరం పెట్టండి. అలా అని పూర్తిగా తిండి మానేయకూడదు. ఉదయాన్నే నడక ప్రారంభించాలి. ఇవన్నీ చేస్తూ బరువు తగ్గాలి. అప్పుడు పీసీఓడీ తగ్గి, గర్భం ధరించడమూ సులభం అవుతుంది.

లేకపోతే ప్రెగ్నెన్సీ సమయంలో బీపీ, షుగర్‌లాంటివి రావడమే కాదు, అబార్షన్లు ఎక్కువగా జరిగే ప్రమాదమూ ఉంది. కాబట్టి డాక్టర్‌ ఇచ్చిన మందులు వాడుతూనే బరువు తగ్గే ప్రయత్నం చేయండి. వరుసగా మూడు నెలలు నెలసరి రాకపోతే గర్భాశయంలో ఉండే పొర మందం అయిపోయి, మరికొన్ని కొత్త సమస్యలకు దారితీస్తుంది. జాగ్రత్త.

డాక్టర్‌ పి. బాలాంబ
సీనియర్‌ గైనకాలజిస్ట్‌